Rumeli Sadâreti Mahkemesi 161 Numaralı Sicil (H.1115-1116 / M. 1704) cilt: 59, sayfa: 528 Hüküm no: 554 Orijinal metin no: [137b-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Hasan Çavuş’un İsmail Ağa’daki alacağını tahsil etmesi Mahmiye-i İstanbul’da Beyceğiz mahâllesinde sâkin işbu râfi‘ü’l-vesîka Hasan Çavuş b. Mehmed nâm kimesne mahmiye-i mezbûrda meclis-i şer‘de el-Hâc İsmail Ağa b. Ahmed nâm kimesne mahzarında üzerine da‘vâ ve takrîr-i kelâm edip mezbûr el-Hâc İsmail Ağa ile gāib ani’l-meclis İsmail Beşe b. Abdülmümin ve Hüseyin Çelebi b. Hasan b. Abdullah zimmetlerinde işbu yedimde olan hüccet-i şer‘iyye nâtıka olduğu üzere cihet-i deyn-i şer‘îden üç yüz guruş hakkım olup meblağ-ı mezbûrdan her biri âharın zimmetine lâzım gelen meblağa tarafeynden emr ü kabûlü hâviye kefâlet-i sahîha-i şer‘iyye ile kefil olmalarıyla hâlâ meblağ-ı mezbûr üç yüz guruşu asâlet ve kefâletine binâen mezbûr el-Hâc İsmail Ağa’dan taleb ederim, suâl olunup alıverilmesi matlûbumdur dedikde, gıbbe’s-suâl el-Hâc İsmail Ağa cevâbında müdde‘î-i mezbûra ancak cihet-i deyn-i şer‘îden yüz guruş zimmetinde lâzımü’l-edâ deyni olduğunu ikrâr lâkin ber-vech-i muharrer kefâletini inkâr edicek müdde‘î-i mezbûrdan müdde‘âsına mutâbıka beyyine taleb olundukda udûl-i ahrâr-ı ricâl-i Müslimînden ve mahmiye-i mezbûrede Gedikpaşa mahâllesinde sâkin Mustafa Çelebi b. Ahmed ve Yenikapı kurbünde sâkin Hasan Çavuş b. Ali nâm kimesneler li-ecli’ş-şehâde meclis-i şer‘e hâzırân olup isre’l-istişhâd fi’l-vâki‘ müdde‘î-i mezbûr Hasan Çavuş’un işbu yedinde olan hüccet-i şer‘iyye nâtıka olduğu üzere mezbûr el-Hâc İsmail Ağa ile gāibân ani’l-meclis İsmail Beşe b. Abdülmümin ve Hüseyin Çelebi b. Hasan b. Abdullah zimmetlerinde üç yüz guruş hakkı olup mezbûr el-Hâc İsmail Ağa ile gāibân-ı mezbûrân İsmail Beşe ve Hüseyin Çelebi’den her biri meblağ-ı mezbûr üç yüz guruşdan âharın zimmetine lâzım gelen meblağa bundan akdem bizim huzûrumuz[da] tarafeynden emr u kabûlü hâviye kefâlet-i sahîha-i şer‘iyye ile kefil oldu, biz bu husûsa bu vech üzere şâhidleriz şehâdet dahi ederiz [deyü] her biri edâ-yı şehâdet-i şer‘iyye eylediklerinde, ba‘de’t-ta‘dîl ve’t-tezkiye şehâdetleri makbûle olmağın mûcebiyle ba‘de’l-hükm meblağ-ı mezbûr üç yüz guruşu asâleten ve kefâleten müdde‘î-i mezbûr Hasan Çavuş’a edâ ve teslîme mezbûr el-Hâc İsmail Ağa’ya tenbîh birle mâ-vaka‘a bi’t-taleb ketb olundu. Fi’l-yevmi’s-sâlis min-Şa‘bâni’l-mu‘azzam li-sene sitte aşere ve mi’e ve elf. Şuhûdü’l-hâl: el-Hâc Mehmed Efendi, İsmail Efendi, Veliyüddin Efendi, el-Hâc Yusuf b. Osman.