Rumeli Sadâreti Mahkemesi 161 Numaralı Sicil (H.1115-1116 / M. 1704) cilt: 59, sayfa: 529 Hüküm no: 555 Orijinal metin no: [138a-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Mahpus Mehmed’in vermemekte ısrar ettiği borcu için birtakım mülkünün satılarak ödenmesi işine kayyım tayin edilmesi Bâ-imzâ-i Hazret Efendi. Mahrûse-i Galata[‘da] Okçu Musa mahâllesinde sâkine Saliha bt. Abdullah nâm [Hatun] mahmiye-i İstanbul’da meclis-i şer‘de takrîr-i kelâm ve ta‘bîr ani’l-merâm edip işbu yedimde olan bir kıt‘a hüccet-i şer‘iyye nâtıka olduğu üzere hâlâ sicn-i Sultânîde mahbûs olan Cinci Mehmed b. Ali zimmetinde bin iki yüz guruş hakkım olup mezbûr Mehmed’in meblağ-ı mezbûru edâ edecek mahrûse-i mezkûrda ve mahmiye-i mezbûrede mâlı olup yesârı mütehakkık olmağla deyn-i mezkûru edâ için bundan akdem mezbûr Cinci Mehmed’e kirâren ve mirâren kıbel-i şer‘den tenbîh ve müddet-i ma‘lûme mehl dahi verilip mehl-i mezkûr mürûr ve hulûl etmiş iken mezbûr Cinci Mehmed deyn-i mezkûru edâda inâd ve muhâlefet ve mu‘attal edip emvâl-i emlâkını itlâf murâd etmeğin husûs-ı mezkûr merkūmu [vukūfu] olan bî-garaz Müslimînden istihbâr ve istifsâr ve minvâl-i meşrûh üzere deyn-i mezkûru edâ edecek mikdârı mâlı bey‘e kıbel-i şer‘den hâzır bi’l-meclis Ahmed Efendi b. Ali emîn ve kayyım nasb u ta‘yîn olunmak matlûbumdur dedikde husûs-ı mezkûr merkūmu [vukūfu] olan bî-garaz Müslimînden hâzirûn bi’l-meclis el-Hâc Hasan b. Süleyman ve Murtaza b. Süleyman ve el-Hâc Abdullah b. el-Hâc İbrahim ve el-Hâc Ahmed b. Mehmed ve Yusuf b. Ahmed ve Ali b. Abdullah ve Mahmud Bey b. Abdullah nâm kimesneler istihbâr ve istifsâr olundukda hâli bâlâda bast olunan minvâl üzere olduğunu Müslimûn-ı mezbûrûndan her biri mahbûs-ı mezbûr muvâcehesinde alâ-tarîkı’l-işhâd haber verdiklerinden sonra mezbûr Ahmed Efendi minvâl-i meşrûh üzere kıbel-i şer‘den emîn ve kayyım nasb u ta‘yîn olundukda ol dahi kabûl ve emr-i hâkimü’ş-şer‘ ile deyn-i mezbûra kifâyet edecek mikdârı malını semen-i misliyle bey‘ ve edâ-i deyne ta‘ahhüd etmeğin mâ-vaka‘a bi’t-taleb ketb olundu. Fi’l-yevmi’s-sânî min-Şa‘bâni’l-mu‘azzam li-sene sitte aşere ve mi’e ve elf. Şuhûdü’l-hâl: Süleyman Efendi b. Mustafa, Ali Bey b. Abdullah, Ahmed Bey b. ( ) , Mahmud Bey b. Abdullah.