Rumeli Sadâreti Mahkemesi 161 Numaralı Sicil (H.1115-1116 / M. 1704) cilt: 59, sayfa: 530 Hüküm no: 556 Orijinal metin no: [138a-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Mesine cemâ’atinden Efda v. Hayim’in, Aron adlı bir başka Yahudi’de olan alacağının tahsili Tüccârdan ve Yahûd tâifesinin Mesine Cemâ‘atinden işbu râfi‘ü’s-sifr Efda v. Haym nâm Yahûdî mahmiye-i İstanbul’da meclis-i şer‘de Aron v. Kamal nâm Yahûdî muvâcehesinde üzerine da‘vâ ve takrîr-i kelâm edip işbu merkūm Aron zimmetinde yedimden iştirâ ve kabz eylediği cins ve levn ve zirâ‘ı beynimizde ilm-i şer‘î ile ma‘lûm çuka ve kumaş semeninden dokuz yüz altmış guruş hakkım olup meblağ-ı merkūmu taleb eylediğimde edâdan imtinâ‘ eder suâl olunup alıverilmek matlûbumdur dedikde gıbbe’s-suâl merkūm Aron cevâbında fi’l-vâki‘ müdde‘î-i merkūma cihet-i mezbûrdan ancak yedi yüz on guruş deyni olduğunu ikrâr iki yüz elli guruşunu inkâr etmeğin müdde‘î-i mezbûrdan ziyâde mezkûreye beyyine taleb olundukda ikāmet-i beyyine için istimhâl etmeğin mehl-i şer‘î ile ba‘de’l-imhâl ikrârı mertebesi olan meblağ-ı mezbûr yedi yüz on guruş müdde‘î-i merkūm Efda’ya edâ ve teslîme merkūm Aron Yahûdîye tenbîh olunup mâ-vaka‘a bi’t-taleb ketb olundu. Fi’l-yevmi’s-sâdis min-Şa‘bâni’l-mu‘azzam li-sene sitte aşere ve mi’e ve elf. Şuhûdü’l-hâl: Mehmed Efendi b. Ahmed, Ali Efendi b. Ahmed, İsmail Efendi b. Siyavuş, Ömer Efendi el-kādı, Mehmed Efendi el-kādı, el-Hâc Yusuf Efendi b. Osman