Rumeli Sadâreti Mahkemesi 161 Numaralı Sicil (H.1115-1116 / M. 1704) cilt: 59, sayfa: 530 Hüküm no: 557 Orijinal metin no: [138b-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Ali b. Hasan’ın, Yenişehir-i Fener kazası muhzırbaşısı Yusuf’a verdiği borcu tahsil etmesi Mahmiye-i İstanbul’da Mesihpaşa mahâllesi ahâlîsinden el-Hâc Ali b. Hasan mahmiye-i mezbûrede meclis-i şer‘de vilâyet-i Rumeli’nde Yenişehri-i Fener kazâsının muhzırbaşısı olan işbu bâ‘isü’l-kitâb el-Hâc Yusuf b. Abdullah’ın sulbî oğlu ve tarafından husûs-i âti’l-beyana vekîl-i şer‘îsi Mehmed Bey mahzarında ikrâr-ı tam ve takrîr-i kelâm edip bundan akdem kazâ-i mezbûr muhzırbaşılığı için oğlu işbu mezbûr Mehmed Bey yediyle müvekkil-i mezbûr el-Hâc Yusuf’a malımdan yetmiş guruş def‘ ve teslîm ol dahi yedimden ahz ve istihlâk etdikden sonra zikr olunan muhzırbaşılık taraf-ı aliyyeden âhara tevcîh olunup zabtı müyesser olmamağla mezbûr el-Hâc Yusuf zimmetinde cihet-i merkūmeden yetmiş guruş ve cihet-i karz-ı şer‘îden dahi altmış guruş min-haysü’l-mecmû‘ yüz otuz guruş hakkım müctemi‘ olmuş idi el-hâletü hâzihi meblağ-ı mecmû‘-ı mezbûrun beş guruşundan ben fâriğ olup bâkī kalan yüz yirmi beş guruşun on beş guruş mukābelesinde mezbûr el-Hâc Yusuf bana bir kırmızı çuka kontuş ve yüz on guruşun ber-vech-i nakd edâ ve teslîm ben dahi yedinden ahz u kabz edip meblağ-ı mecmû‘-ı mezbûr yüz otuz guruşa müte‘allıka âmme-i da‘vâ ve kâffe-i mutâlebâtdan müvekkil-i mezbûr el-Hâc Yusuf ile oğlu işbu vekîl-i mezbûr [Mehmed] Bey’den her birinin zimmetini ibrâ ve iskāt eyledim min-ba‘d mezbûrân el-Hâc Yusuf ve Mehmed Bey ile meblağayn-ı mezbûresine müte‘allıka vechen mine’l-vücûh aslâ da‘vâ ve nizâ‘ım yokdur dedikde gıbbe’t-tasdîkı’ş-şer‘î mâ-vaka‘a bi’t-taleb ketb olundu. Fi’l-yevmi’s-sâbi‘ min-Şa‘bâni’l-mu‘azzam li-sene sitte aşere ve mi’e ve elf. Şuhûdü’l-hâl: Mustafa b. Mehmed Efendi, Hasan Çelebi b. Mehmed, İbrahim Ağa b. Ebî Bekr, Ahmed Bey b. Mehmed kethüdâ-i Ocak, Mustafa b. Ali, İbrahim b. Aşur kovacı.