Bab Mahkemesi 54 Numaralı Sicil (H. 1102 / M. 1691) cilt: 20, sayfa: 385 Hüküm no: 469 Orijinal metin no: [82a-3] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Hacı Mehmed b. Abdullah’ın bir kısım eşyasını İvaz Çelebi b. Abdülmennân’a satması Husûs-ı âti’z-zikrin mahallinde ketb ü tahrîri için iltimâs olunmağın, savb-ı şer‘-i enverden irsâl olunan Ebûbekir Efendi haffâf tâifesinden el-Hâc Mehmed b. Abdullah’ın mahmiye-i İstanbul’da Sultanhamamı kurbunda Çakır Ağa mahallesinde sâkin olduğu menzile varıp, zeyl-i kitâbda muharrerü’l-esâmi müslimîn huzûrlarında akd-i meclis-i şer‘-i hatîr eyledikde, mezbûr el-Hâc Mehmed meclis-i ma‘kūd-ı mezbûrda râfi‘ü hâze’l-kitâb İvaz Çelebi b. Abdülmennân mahzarında ikrâr-ı tâm ve takrîr-i kelâm edip, yedimde mülk ve hakkım olan eşyâmdan on köhne kadife yasdık ve bir orta kaliçesi ve üç yan keçesi ve iki seccâde ve def‘a bir seccâde ve bir leğen ve bir ibrik ve bir kebîr güğüm ve def‘a bir leğen ve bir kahve tepsisi ve iki köhne kilim ve bir kebîr leğen ve cam tâbesi ve bir mangal ve iki şam‘danımı bi safkatin vâhidetin mezbûr İvaz Çelebi’ye dokuz bin üç yüz yirmi iki akçeye [bey‘] ve temlîk ve teslîm edip, ol dahi vech-i muharrer üzre iştirâ ve kabûl ve temellük ve tesellüm eyledikden sonra semen-i mezbûr dokuz bin üç yüz yirmi iki akçeyi merkūm İvaz Çelebi yedinden tamâmen ahz u kabz ve istîfâ eyledim. Ba‘de’l-yevm eşyâ-i muharrere-i mezkûre işbu mezbûr İvaz Çelebi’nin mülk-i müşterâsı olmuşdur, benim vechen mine’l-vücûh alâka ve medhalim kalmadı, keyfe mâ yeşâ ve yahtâr mutasarrıf olsun dedikde, mukırr-ı mezbûr el-Hâc Mehmed’in vech-i muharrer üzre cârî ve sâdır olan cemî‘ kelimâtını el-mukarru lehü’l-mezbûr İvaz Çelebi vicâhen tasdîk ve şifâhen tahkīk etmeğin, vâki‘ hâli mezbûr Ebûbekir Efendi mahallinde ketb ve tahrîr edip, ba‘dehû ma‘an ba‘s olunan Mustafa Beşe b. Mehmed ve Abdullah Efendi b. Veli ile meclis-i şer‘a gelip alâ vukū‘ihî inhâ ve takrîr etmeğin, mâ hüve’l-vâki‘ bi’t-taleb ketb olundu. Fi’l-yevmi’r-râbi‘ aşer min Cumâdelâhire li sene isneteyn ve mi’e ve elf. Şuhûdü’l-hâl: Sâbıkūn.