Rumeli Sadâreti Mahkemesi 161 Numaralı Sicil (H.1115-1116 / M. 1704) cilt: 59, sayfa: 536 Hüküm no: 564 Orijinal metin no: [140a-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. İsmihan b. Şaban’ın Esirci Mustafa’dan aldığı ve hastalıklı çıktığını iddia ettiği cariye davasında sulh olduğu Mahrûse-i Galata’da Arapcami‘i mahâllesi sâkinelerinden İsmihan b. Şa‘bân zâtı ba‘de’t-ta‘rîfi’ş-şer‘î mahmiye-i İstanbul’da meclis-i şer‘de esirci tâifesinden iş bu râfi‘ü’l-vesîka el-Hâc Mustafa b. Ahmed mahzarında ikrâr-ı tam ve takrîr-i kelâm edip mezbûr el-Hâc Mustafa bundan akdem câriye-i memlûkesi işbu hâzıratü bi’l-meclis orta boylu açık kaşlı elâ gözlü Rusiyyetü’l-asl Hadîce nâm mevsûfeyi yüz doksan guruş semen-i makbûza bana bey‘ ü teslîm ben dahi iştirâ ve kabz ve kabûl etdiğimden sonra câriye-i merkūmenin firâşına tebevvül edip ve südde? marazına mübtelât olduğuna hâkim olup ve marazeyn-i mezkûreynin mevsûfe-i merkūmede kadîm olmağla mevsûfe-i merkūme-i mezbûr el-Hâc Mustafa’ya red edip medfû‘um olan semen-i mezbûr yüz doksan guruşu mezbûr el-Hâc Mustafa’dan taleb eylediğimde ol dahi [140b] mevsûfe-i mezbûrede aybeyn-i mezbûreynin kadîm olduğunu ikrâr etmekle beynimizde nizâ‘-ı kesîr cereyân etmişidi el-hâletü hâzihi mezbûr el-Hâc Mustafa vesâtet-i muslihîn ile da‘vâ-i mezkûremden beni yirmi guruş üzerine sulh eyledikde ben dahi sulh-ı mezbûru kabûl ve bedel-i sulh olan meblağ-ı mezbûrun mukaddemâ on guruşunu ve on guruşunu dahi iş bu meclisde tamamen ahz u kabz edip mevsûfe-i mezbûre Hadîce’nin aybına müte‘allıka âmme-i da‘vâdan mezbûr el-Hâc Mustafa’nın zimmetini ibrâ ve iskāt eyledim dedikde gıbbe’t-tasdîkı’ş-şer‘î mâ-vaka‘a bi’t-taleb ketb olundu. Fi’l-yevmi’s-sâbi‘ min-Şa‘bâni’l-mu‘azzam li-sene sitte aşere ve mi’e ve elf. Şuhûdü’l-hâl: Ali Efendi b. Ahmed Efendi, el-Hâc Ahmed Efendi b. Ahmed, İsmail Efendi el-kādı, Ömer Efendi el- kādı, Veli Efendi el-kādı, Mehmed Efendi el-kādı.