Rumeli Sadâreti Mahkemesi 161 Numaralı Sicil (H.1115-1116 / M. 1704) cilt: 59, sayfa: 536 Hüküm no: 565 Orijinal metin no: [140b-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Bozkır Kazası ahalisinden Ali’nin Bozkır Kazası eski nâibi Mustafa Efendi’den alacak iddiası Vilâyet-i Anadolu’da Bozkır kazâsına tâbi‘ Akkilise nâm karye ahâlîsinden Ali b. Muharrem nâm kimesne mahmiye-i İstanbul’da meclis-i şer‘-i hatîr-i lâzımü’t-tevkīrde sâbıkā kazâ-i mezbûrda nâibü’ş-şer‘ olan işbu bâ‘isü’l-vesîka Mustafa Efendi b. Mehmed mahzarında üzerine da‘vâ ve takrîr-i kelâm edip târîh-i kitâbdan üç sene mukaddem mezbûr Mustafa Efendi kazâ-i mezbûrda nâib iken beynimizde ma‘lûm bir hüccet husûsu içün üç buçuk guruş ve bir def‘a dahi yirmi beş guruşumu ahz u kabz eylediğinden sonra meblağ-ı mezbûr yirmi beş guruşu bana redd ü teslîm eylediğinden mâ‘adâ tekrâr bi-gayrı hakkın otuz bir guruşumu dahi ahz u kabz ve istihlâk etmekle suâl olunup alıverilmesi matlûbumdur dedikde gıbbe’s-suâl ve akībe’l-inkâr müdde‘î-i mezbûrdan takrîr-i meşrûhuna mutâbıka beyyine taleb olundukda ityân-ı beyyineden izhâr-ı acz ile istihlâf etmeğin fi’l-hakīka müdde‘î-i merkūmdan husûs-ı mezbûr için müdde‘î-i mezbûra red ve teslîm olunan yirmi beş guruşdan mâ‘adâya vech-i muharrer otuz bir guruşunu dahi ahz u kabz etmeyip ve ol vechile meblağ-ı mezbûrun red ve teslîmi üzerine lâzım gelmediğine merkūm Mustafa Efendi’ye yemîn teklîf olundukda ol dahi hasbe’l-mesûl yemîn billâhi’l-aliyyi’l-a‘lâ etmeğin mûcibince müdde‘î-i merkūm Ali bilâ-beyyine bî-vech mu‘ârazadan men‘ birle mâ-hüve’l-vâki‘ bi’t-taleb ketb olundu. Fi’l-yevmi’s-sâmin min-Şa‘bâni’l-mu‘azzam li-sene sitte aşere ve mi’e ve elf. Şuhûdü’l-hâl: Veli Efendi el-kādı, Emin Mehmed Efendi el-kâtib, Said Çelebi b. Ali, Ahmed Çelebi b. Mehmed ve gayruhum.