Rumeli Sadâreti Mahkemesi 161 Numaralı Sicil (H.1115-1116 / M. 1704) cilt: 59, sayfa: 537 Hüküm no: 566 Orijinal metin no: [140b-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Âmine Hatun’un Hasan Çelebi’ye satmış olduğu Rus asıllı köleyi ücretini iade ederek geri alması Mahrûse-i İstanbul’da Uzun Şücâ‘ mahâllesinde sâkin işbu râfi‘ü’l-kitâb Ahmed Çelebi b. Mehmed nâm kimesne mahmiye-i mezbûrede meclis-i şer’de Âmine bt. Halil nâm hatun mahzarında üzerine da‘vâ ve takrîr-i kelâm edip bundan akdem mezbûre Âmine Hatun açık kaşlı sarı elâ gözlü Rusiyyü’l-asl tahmînen on altı yaşında Ahmed b. Abdullah’ı abd-i memlûkü olmak üzere yüz yirmi guruş semen-i medfû‘a bana bey‘ ü teslîm ben dahi ber-vech-i muharrer ba‘de’l-iştirâ ve’l-kabz gulâm-ı mevsûf-ı mezbûru yüz altmış guruş semen-i makbûza Hasan Çelebi b. Mehmed b. Ahmed nâm kimesneye bey‘ ü teslîm ol dahi ber-vech-i muharrer ba‘de’l-ahz gulâm-ı mevsûf-ı mezbûr Ahmed’i mezbûr Hasan Çelebi’nin yedinde iken Mustafa Çelebi b. Mehmed b. Mustafa nâm kimesne mevsûf-ı mezbûr Ahmed’e müstahık çıkıp kendinin mülkü olup mülkünden ibâk eylediğini târîh-i kitâbdan beş gün mukaddem huzûr-ı hâkimü’ş-şer‘de merkūm Hasan Çelebi muvâcehesinde da‘vâ ve müdde‘âsını udûl-i ahrâr-ı ricâl-i Müslimînden İsmail Çelebi b. Mustafa ve Halil Ağa b. Receb nâm kimesneler şehâdetleriyle şer‘an isbât edip ba‘de’l-half gulâm-ı mevsûf-ı mezbûru hükm-i hâkimü’ş-şer‘le bi’l-istihkāk ahz u kabz etmekle mezbûr Hasan Çelebi dahi bana mürâca‘at edip semen deyü medfû‘u olan meblağ-ı mezbûr yüz altmış guruşu hükm-i hâkim ile bi’l-mürâca‘a benden istirdâd ve kabz etmekle hâlâ ben dahi mezbûre Âmine Hatun’a mürâca‘at edip semen deyü medfû‘um olan meblağ-ı mezbûr yüz yirmi guruşu mezbûre Âmine Hatun’dan bi’l-mürâca‘a talep ederim suâl olunsun, dedikde gıbbe’s-suâl mezbûre Âmine Hatun cevâbında mevsûf-ı [141a] mezbûru zevc-i sâbıkım hâzır bi’l-meclis Mehmed Ağa b. Mustafa zevciyet beynimizde kāim iken abd-i memlûkü olmak üzere bana hibe-i sahîha-i şer‘iyye ile hibe edip ben dahi ber-vech-i muharrer ba‘de’l-isbât ve’l-kabz mevsûf-ı mezbûru minvâl-i meşrûh üzere abd-i memlûk olmak üzere müdde‘î-i mezbûr Ahmed Çelebi’ye semen-i mezbûr yüz yirmi guruşa bey‘ ve teslîm ve kabz-ı semen-i mezbûr eylediğini ikrâr lâkin mezbûr Mustafa Çelebi’nin merkūm Hasan Çelebi yedinden ber-vech-i muharrer bi’l-istihkāk hükm-i hâkim ile ahz eylediği gulâm benim müdde‘î-i mezbûra bey‘ ve teslîm eylediğim bi-aynihî mevsûf-ı mezbûr Ahmed olduğu ma‘lûmum değildir deyicek müdde‘î-i mezbûrdan müdde‘âsına mutâbıka beyyine taleb [olundukda] udûl-i ahrâr-ı ricâl-i Müslimînden es-Seyyid Ali Çelebi b. Mehmed ve Ahmed Efendi b. Mehmed nâm kimesneler li-ecli’ş-şehâde meclis-i şer‘de hâzırân olup isre’l-istişhâd fi’l-vâki‘ târîh-i mezbûrda bizim huzûrumuzda mezbûr Mustafa Çelebi b. Mehmed b. Mustafa’nın merkūm Hasan Çelebi b. Mehmed b. Ahmed’den huzûr-ı hâkimü’ş-şer‘le şâhidân-ı mezbûrân İsmail Çelebi ve Halil Ağa şehâdetleriyle mezbûr Hasan Çelebi muvâcehesinde ba‘de’l-isbât ve’l-half bi’l-istihkāk ahz u kabz eyleyip ve mezbûr Hasan Çelebi’nin semen-i mezbûr yüz altmış guruşu hükm-i hâkim ile bi’l-mürâca‘a müdde‘î-i mezbûrdan ahz eylediği mevsûf-ı mezbûr Ahmed nâm gulâm bi-aynihî işbu mezbûre Âmine Hatun’un müdde‘î-i mezbûr Ahmed Çelebi’ye semen-i mezbûr yüz yirmi guruşa bey‘ eylediği mevsûf-ı mezbûr Ahmed’dir, biz bu husûsa bu vech üzere şâhidleriz, şehâdet dahi ederiz, deyü her biri edâ-i şehâdet-i şer‘iyye eylediklerinde ba‘de’t-ta‘dîl ve’t-tezkiye şehâdetleri makbûle olmağın mûcebiyle ba‘de’l-hükm ve’t-tenbîh mezbûr Ahmed Çelebi meclis-i şer‘de mezbûre Âmine Hatun mahzarında takrîr-i kelâm edip ânifen bana teslîme tenbîh olunan semen-i mezbûr yüz yirmi [guruşu] mezbûre Âmine Hatun bana edâ ve teslîm ben dahi yedinden tamâmen ahz u kabz eyledim dedikde gıbbe’t-tasdîkı’ş-şer‘î mâ-vaka‘a bi’t-taleb ketb olundu. Fi’l-yevmi’s-sânî min-Şa‘bâni’l-mu‘azzam li-sene sitte aşere ve mi’e ve elf. Şuhûdü’l-hâl: es-Seyyid İsmail Çelebi b. Bayram, es-Seyyid Ali Çelebi b. Mehmed, Halil Ağa b. Receb, Ahmed Bey b. Mehmed, Osman Çelebi b. Abdullah, Süleyman Efendi.