Rumeli Sadâreti Mahkemesi 161 Numaralı Sicil (H.1115-1116 / M. 1704) cilt: 59, sayfa: 538 Hüküm no: 567 Orijinal metin no: [141a-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Varisi olmadığı gerekçesi ile emvali beytülmala kalan Âmine’nin akrabası olduğunu iddia eden Havva’nın iddiasının tasdiki Bâ-imzâ-i Hazreti Efendi. Mahmiye-i İstanbul’da Mollagürânî kurbünde Fenâî Dede mahâllesinde sâkin iken bundan akdem vefât eden Âmine bt. Mustafa b. Hamza b. Abdullah’ın vech-i âtî üzere verâsesi olduğunu iddi‘â eden râfi‘atü hâzihi’l-vesîka Havva bt. Mehmed nâm hatun mahmiye-i mezbûrede meclis-i şer‘de mahmiye-i mezbûrede bi’l-fi‘il beytülmal emîni olup bilâ-vâris-i ma‘rûf fevt olanların terekelerini kabza bâ-fermân-ı âlî memûr ve kıbel-i şer‘den mezûn olmağla müteveffâ-yı mezbûrenin ber-mûceb-i defter terekesine ber-vech-i muharrer cânib-i beytülmala aid olmak zu‘muyla vâzı‘ü’l-yed olan Mehmed Bey b. İslâm nâm kimesne mahzarında üzerine da‘vâ ve takrîr-i kelâm edip ben müteveffât-ı mezbûre Âmine’nin babası mezbûr Mustafa’nın li-ebeveyn er karındaşı mezbûr Mehmed’in kızı olup benim babam mezbûr Mehmed ile müteveffa-i mezbûre Âmine’nin babası merkūm Mustafa li-ebeveyn karındaşlar olup babaları ism-i mezbûr Hamza ve dedeleri ismi mezbûr Abdullah ve vâlideleri ismi Zilkade bt. Mehmed ve maskat-ı re’sleri zikr-i mürûr eden Fenâî Dede mahâllesi olup müteveffât-ı mezbûre Âmine’nin verâseti minvâl-i meşrûh üzere bana münhasıra olup benden gayri vârisi ve terekesine müstahıkk-ı âhar yoğiken emîn-i mezbûr Mehmed Bey müteveffât-ı mezbûrenin terekesine bi-gayrı hakkın vaz‘-ı yed eder suâl olunup kasr-ı yedine tenbîh ve bana teslîm olunmak matlûbumdur dedikde gıbbe’s-suâl emîn-i mezbûr Mehmed Bey cevâbında müteveffât-ı mezbûrenin zâhirde vâris-i ma‘rûfu olmayıp terekesi cânib-i beytülmala aid olmak zu‘muyla ber-mûceb-i defter terekesine bi’l-emâne vaz‘u’l-yed eylediğini ikrâr lâkin müdde‘î-i mezbûr müteveffâ-yı mezbûrun vech-i meşrûh üzere hasren vârisesi olduğu ma‘lûmum değildir deyücek müdde‘iye-i mezbûreden müdde‘âsına mutâbıka beyyine talep olundukda udûl-i ahrâr-ı ricâl-i Müslimînden [141b] ve mahâlle-i mezbûr ahâlîsinde Ebubekir Bey b. Mustafa nâm kimesne ile harâir-i asliyâtdan Fâtıma bt. İbrahim ve Rabia bt. Mustafa nâm hatunlar li-ecli’ş-şehâde meclis-i şer‘e hâzırân olup isre’l-istişhâd ve fi’l-vâki‘ işbu müdde‘iye-i mezbûre Havva’nın babası mezbûr Mehmed müteveffât-ı mezbûre Âmine’nin babası merkūm Mustafa ile li-ebeveyn karındaşlar olup babaları ismi merkūm Hamza ve dedeleri ismi mezbûr Abdullah ve vâiledeleri ismi mezbûre Zilkade bt. Mehmed ve maskat-ı re’sleri zikri mürûr eden Fenâî Dede mahâllesi olup müteveffât-ı mezbûre Âmine’nin verâseti vech-i meşrûh üzere iş bu müdde‘iye-i mezbûre Havva’ya münhasıradır, bundan gayr-ı vârisi ve terekesine müstehıkk-ı ahâr olduğu ma‘lûmumuz değildir, biz bu husûsa bu vech üzere şâhidleriz, şehâdet dahi ederiz deyü her biri edâ-yı şehâdet-i şer‘iyye etdiklerinde ba‘de’t-ta‘dîl ve’t-tezkiye şehâdetleri makbûle olmağın mûcibince ba‘de’l-hükm ve’t-tenbîh mâ-vaka‘a bi‘t-taleb ketb olundu. Fi’l-yevmi’s-sâmin min-Şa‘bâni’l-mu‘azzam li-sene aşere ve mi’e ve elf Şuhûdü’l-hâl: İmam Mustafa Efendi b. Mustafa, Mehmed Çelebi b. İbrahim el-müezzin, Ahmed Çelebi b. Abdullah, Mustafa Ağa b. İbrahim, İbrahim Beşe b. Abdullah, Hasan Bey b. Süleyman, Ahmed Çelebi b. Osman.