Rumeli Sadâreti Mahkemesi 161 Numaralı Sicil (H.1115-1116 / M. 1704) cilt: 59, sayfa: 540 Hüküm no: 568 Orijinal metin no: [141b-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Maktül Sipahiler Ağası Salim’in zevcesi Safiyye’nin, eşinin işlerini takip etmek üzere Mehmed Ağa’yı vekil tayin ettiği Sâbıkā Sipâhîler Ağası olup bundan akdem taraf-ı şehriyârîden mağdûben katlolunan Salim Ağa b. Mustafa b. Ali’nin zevcesi ve evlâd-ı sagīrinin kıbel-i şer‘i enverden mansûb vasiyye ve vâlideleri olan Safiye bt. Abdullah b. Abdurrahman tarafından husûs-ı âti’l-beyana vekîli olduğu zât-ı mezbûreyi ma‘rifet-i şer‘iyye ile ârifân olan Ömer Çelebi b. Mustafa ve Ali Çelebi b. Abdullah nâm kimesneler şehâdetleriyle şer‘an sâbit olan Mehmed Ağa b. Mahmud nâm kimesne mahmiye-i mezbûrede meclis-i şer‘-i hatîrde bâ‘isü’l-kitâb Mehmed Efendi b. Muharrem nâm kimesne mahzarında ikrâr ve takrîr-i kelâm edip müvekkilem mezbûre Safiye Hatun sagīr-i mezbûrûnun vasîleri olup müteveffâ-yı mezbûrun nâs ile mu‘âmelâtı kesîresi olmağla müteveffâ-yı mezbûrun zimem-i nâsda olan hukūkunu taleb ü da‘vâ ve ahz u kabza ve kendüye îsal ve teslîme ve zuhûr eden husamâsıyla mürâfa‘a ve husûmet ve redd-i cevâba ve bunlar mütevakkıf olduğu umûrun küllîsine tarafından işbu mezbûr Mehmed Efendi’yi vekîl ve nâib-i menâb ve ta‘yîn eyledi dedikde mezbûr Mehmed Efendi dahi ber-vech-i muharrer vekâlet-i merkūmeyi kabûl ve merâsimini kemâ-yenbağī edâya ta‘ahhüd ve iltizâm etmeğin mâ-hüve’l-vâki‘ bi‘t-taleb ketb olundu. Fi’l-yevmi’l-âşir min-Şa‘bâni’l-mu‘azzam li-sene sitte aşere ve mi’e ve elf. Şuhûdü’l-hâl: el-Hâc Ahmed b. Abdurrahman, Ali Çelebi b. Abdullah, Ömer Çelebi b. Mustafa, İsmail Efendi b. Siyavuş, Mehmed Efendi b. Ahmed.