Bab Mahkemesi 54 Numaralı Sicil (H. 1102 / M. 1691) cilt: 20, sayfa: 385 Hüküm no: 470 Orijinal metin no: [82b-1] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Hacı Mehmed b. Abdullah’ın bir kısım eşyasını karısı Fâtıma bt. Receb’e satması Husûs-ı âti’z-zikrin mahallinde ketb ü tahrîri için savb-ı şer‘den bi’l-iltimâs irsâl olunan Ebûbekir Efendi haffâf tâifesinden el-Hâc Mehmed b. Abdullah’ın mahmiye-i İstanbul’da Sultanhamamı kurbunda Çakır Ağa mahallesinde sâkin olduğu menzile varıp, zeyl-i kitâbda muharrerü’l-esâmi müslimîn huzûrlarında akd-i meclis-i şer‘-i hatîr eyledikde, mezbûr el-Hâc Mehmed meclis-i ma‘kūd-ı mezbûrda zevcesi râfi‘atü hâze’l-kitâb Fâtıma Hâtun bt. Receb b. Abdullah ikrâr-ı âti’z-zikri tasdîka vekîl olduğu zât-ı mezbûreyi ma‘rifet-i şer‘iyye ile ârifân Ali Çelebi b. Abdülmennân ve Mehmed Bey b. Ali şehâdetleriyle şer‘an sâbit olan İvaz Çelebi b. Abdullah mahzarında ikrâr-ı tâm ve takrîr-i kelâm edip, bin doksan dört senesi şehr-i Rebî‘u’lâhiri’nde silk-i mülkümde münselik olan eşyâmdan yirmi altı sahan ve on bir sahan kapağı ve iki leğen ve bir abdest leğeni ve bir hamam leğeni ve bir bakraç ve iki kebîr tepsi ve üç vasat tepsi ve iki sagīr tepsi ve üç hoşâb tası ve bir kahve tepsisi ve üç sagīr ibrik ve gılâflarıyla yirmi beş kadife yasdık ve üç çuka mak‘ad ve def‘a üç çuka mak‘ad ve üç Selânik orta keçesi ve on minder ve iki sagīr minder ve üç seccâde ve bir sagīr mangal ve çarşebiyle on üç yorgan ve üç döşek ve iki cedîd yasdık yüzü ve bir mâî kumaş mak‘ad ve def‘a beş köhne yasdık yüzü ve bir kırmızı ihrâm ve iki şam‘dânımı bi safkatin vâhidetin zevcem müvekkile-i mezbûre Fâtıma Hâtun’a otuz altı bin akçeye bey‘ ve temlîk ve teslîm, ol dahi iştirâ ve kabûl ve temellük ve tesellüm eyledikden sonra semen-i mezbûr otuz altı bin akçeyi yedinden tamâmen ahz u kabz etmişdim. Eşyâ-i muharrere-i mezkûre târih-i mezbûrdan beri zevcem mezbûre Fâtıma Hâtun’un mülk-i müşterâsıdır benim aslâ alâka ve medhalim yokdur, keyfe mâ yeşâ mutasarrıf olsun dedikde, gıbbe’t-tasdîki’ş-şer‘î vâki‘ hâli mezbûr Ebûbekir Efendi mahallinde ketb ü tahrîr edip, ba‘dehû ma‘an ba‘s olunan Mustafa Beşe b. Mehmed ve Abdullah Efendi b. Veli ile meclis-i şer‘a gelip alâ vukū‘ihî inhâ ve takrîr etmeğin, mâ vaka‘a bi’t-taleb ketb olundu. Fi’l-yevmi’r-râbi‘ aşer min Cumâdelâhire li sene isneteyn ve mi’e ve elf. Şuhûdü’l-hâl: Sâbıkūn.