Bab Mahkemesi 54 Numaralı Sicil (H. 1102 / M. 1691) cilt: 20, sayfa: 386 Hüküm no: 471 Orijinal metin no: [82b-2] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Hacı Ali b. Hızır ile ortağının fırın hisselerini Niko v. Marnikola’ya satması Mahmiye-i İstanbul’da olan ekmekçi tâifesinden Niko v. Marnikola nâm zimmî meclis-i şer‘-i şerîf-i enverde, el-Hâc Ali b. Hızır ve şerîki İbrahim Beşe b. Süleyman mahzarlarında üzerlerine da‘vâ ve takrîr-i kelâm edip, târih-i kitâbdan üç gün mukaddem mezbûr el-Hâc Ali ve İbrahim Beşe Davudpaşa kurbunda vâki‘ ekmekçi kurbunda taht-ı tasarruflarında olan dört sehimden iki sehim hisselerine müte‘allik olan on re’s Bârgirlerini ve yedimizde ma‘lûm tekne ve sâir âlâtını yetmiş yaldızlı altına bey‘-i kat‘î ile bana bey‘ ü temlîk, ben dahi ber vech-i muharrer iştirâ ve temlîk ve kabûl ve semen-i mezbûrun on yaldız altınını mezbûrân el-Hâc Ali ve İbrahim Beşe’ye edâ ve teslîm, onlar dahi yedimden ahz u kabz etmişler iken mebî‘-i mezbûr on re’s Bârgirleri ile âlât-ı mezkûreyi bana teslîm ve semen-i bâkī altı altını yedimden kabzdan imtinâ‘ ederler, hâlâ mezbûrân el-Hâc Ali ve İbrahim Beşe’ye suâl olunup ber vech-i muharrer mebî‘-i mezbûru bana teslîm ve semen-i bâkī-i mezbûru yedimden kabza tenbîh olmak matlûbumdur dedikde, gıbbe’s-suâl ve akībe’l-inkâr müdde‘î-i mezbûrdan müdde‘âsına mutâbıka beyyine taleb olundukda, udûl-i müslimînden olup Hoca Üveys mahallesi sâkinlerinden tâife-i mezbûre kethüdâsı el-Hâc Ahmed b. Yusuf ve Canbâziye mahallesinden Hasan Çelebi b. Osman Sayıcı nâm kimesneler li ecli’ş-şehâde meclis-i şer‘a hâzırân olup isre’l-istişhâd, fi’l-hakīka târih-i mezbûrda mezbûrân el-Hâc Ali ve İbrahim Beşe zikr olunan fırında dört sehimden iki sehim hisselerine müte‘allik olan on re’s Bârgirlerini ve tekne ve sâir beynlerinde ma‘lûm âlât-ı müdde‘î-i mezbûr Niko’ya bizim huzûrumuzda yetmiş yaldız altına kat‘â bey‘ ve temlîk merkūm Niko dahi ba‘de’l-iştirâ ve’l-kabûl semen-i mezbûrun on altınını mezbûrâna def‘ ve teslîm, onlar dahi ahz u kabz eyledi. Biz bu husûsa bu vech üzre şâhidleriz, şehâdet dahi ederiz deyu her biri edâ-i şehâdet-i şer‘iyye eylediklerinde ba‘de’t-ta‘dîl ve’t-tezkiye şehâdetleri makbûle olmağın, mûcebince mebî‘-i mezbûru müdde‘î-i mezbûra teslîm ve semen-i bâkī-i mezbûru yedinden kabza mezbûrân el-Hâc Ali ve İbrahim Beşe’ye tenbîh olunup, mâ vaka‘a bi’t-taleb ketb olundu. Fi’l-yevmi’s-sâmin ve’l-ışrîn min Cumâdelâhire sene 1102. Şuhûdü’l-hâl: Çukadâr el-Hâc Hasan b. Abdullah, Mustafa Beşe b. Ahmed, İbrahim Çelebi b. Ahmed, Osman Beşe b. Hasan.