Rumeli Sadâreti Mahkemesi 272 Numaralı Sicil (H. 1171-1172/ M. 1758) cilt: 74, sayfa: 68 Hüküm no: 5 Orijinal metin no: [2a-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Vefat eden Esirci Ali Ağa’dan alacakları olanların eşi Hatice Hatun’a açtıkları davada anlaşma sağlanması Ma‘rûz Keresteci esnâfından es-Seyyid Mehmed Ağa ve şerîki Ali Çelebi nâm kimesneler kendi taraflarından asâleten ve âhar şerîkleri gāib ani’l-meclis Tufan v. Yorgi v. Manuk tarafından bâ‘isetü’l-vekâle vekîl olmalarıyla vekâleten mahfil-i şer‘iyyâtda müteveffâ Esirci Ali Ağa b. Abdullah’ın zevce-i metrûkesi ve zâtı ta‘rîf-i şer‘î ile mu‘arrefe olan Hadice Hatun muvâcehesinde müteveffâ-yı merkūm Ali Ağa hayatında yedimizden iştirâ ve kabz eylediği ecnâs ve envâ‘ı beynimizde ma‘lûm kereste bahâsından zimmetinde hakkımız olan yedi yüz otuz yedi guruşun dört yüz otuz yedi guruşunu bi-kadri’l-hısas yedinden ahz ü istîfâ edip bâkī üç yüz guruşunu kable’l-ahz fevt olmağla meblağ-ı mezkûru mezbûre Hadice Hatun’un zevci müteveffâ-yı mezbûrun deyn-i mezbûruna vâfî vaz‘-ı yed eylediği tereke-i vâfiyesinden hâlâ taleb ederiz deyü da‘vâya tasaddî eylediklerinde mezbûre Hadice Hatun dahi cevâbında deyn-i mezkûru ikrâr, lâkin ber-vech-i muharrer müteveffâ-yı deyn-i mezbûra vâfî terekesine vaz‘-ı yedini inkâr etmekle, beynlerinde ba‘de’l-münâza‘a müdde‘iyân-ı mezbûrân da‘vâ-yı mezkûresinden mezbûre Hadice Hatun ile an-inkâr yüz otuz guruşa ba‘de’l-musâlaha ve’l-kabûl mâ‘adâ müdde‘âlarından müteveffâ-yı mezbûr ile mezbûre Hadice Hatun’un zimmetini ibrâ ve iskāt edip kat‘-ı nizâ‘ etdiklerinden sonra mezbûre Hadice Hatun bedel-i sulh-ı mezkûr yüz otuz guruşu hâlen ve def‘aten edâya iktidârım yokdur deyü ber-vech-i âtî te’cîl ve taksîte tâlibe olmağla mezbûrân es-Seyyid Mehmed Ağa ve Ali Çelebi dahi mezbûre Hadice Hatun’u bedel-i mezbûrdan beher sene tamâmında bize otuz guruş vermekle târîh-i i‘lâmdan dört sene dört ay tamâmına dek edâ etmek [üzere] bi’l-asâle ve bi’l-vekâle te’cîl ve taksît eylediklerinde mezbûre Hadice Hatun dahi kabûl ve müddet-i mezkûre tamâmına dek ber-vech-i muharrer mukassatan edâ ve teslîme ta‘ahhüd eylediği huzûr-ı âlîlerine i‘lâm olundu. Fî 23 Cemâziyelâhire sene 1171.