Rumeli Sadâreti Mahkemesi 272 Numaralı Sicil (H. 1171-1172/ M. 1758) cilt: 74, sayfa: 68 Hüküm no: 6 Orijinal metin no: [2b-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Gelibolu Kalemi Adet-i Ağnam Mukataası mültezimi Mustafa Ağa’nın Miri Hassa Kasabbaşı Halil Ağa’nın getirdiği koyunlardan vergi almaktan men edilmesi Ma‘rûz Husûs-ı âti’l-beyânın mahâllinde istimâ‘ ve ketb için cânib-i şer‘den me’zûnen irsâl olunan mîrî kâtibi fahrü’l-müderrisîni’l-kirâm Sıdkı Mustafa Efendi Defterdâr kapısı’nda Başbâki kulu Ağa’ya mahsûs odaya varıp huzûr-ı Müslimînde akdeylediği meclis-i şer‘de Rumeli’de Gelibolu Kalemi âdet-i ağnâmı mukāta‘asına ber-vech-i mâlikâne mutasarrıf olan sâhib-i arzuhâl Mustafa Ağa b. Abdullah meclis-i ma‘kūd-ı mezkûrda hâlâ Hâssa Kasabbaşısı olup derûn-ı arzuhâlde mezkûrü’l-ism Halil Ağa b. Abdurrahman b. Abdullah’ın husûs-ı âti’l-beyânda vekâleti sâbit olan Mehmed Ağa b. Mustafa muvâcehesinde ber-vech-i mâlikâne uhde ve iltizâmımda olan Gelibolu ve İpsala ve Migalkara [Malkara] ve Keşan ve tevâbi‘i kazâlarda vâki‘ mîrî kışlaklara bin yüz altmış dokuz ve yetmiş senelerinde müvekkil-i mûmâ-ileyh Kasabbaşı Halil Ağa tarafından vaz‘ ve ol havâlîlerden imrâr olunan seksen dört binden mütecâviz ağnâm-ı mîriye ve keçi ve kuzunun seneteyn-i mezkûreteynde iktizâ eden rüsûm-ı âdet-i ağnâmlarını ber-mûceb-i berât-ı âlîşân edâsı lâzım iken müvekkil-i mûmâ-ileyh Kasabbaşı Halil Ağa mücerred ta‘yînât-ı mîriye için tedârik ve Âsitâne’ye ihzâr olunan ağnâmdır deyü ağnâm-ı mezkûrun rüsûm-ı âdet-i ağnâmların edâda muhâlefet etmekle işbu yedimde olan sûret-i derkenârlara ba‘de’n-nazar seneteyn-i mezkûreteynde iktizâ eden rüsûm-ı âdet-i ağnâmların bana teslîme tenbîh olunmasın taleb ederim deyü ba‘de’d-da‘vâ ve’l-istintâk vekîl-i merkūm cevâbında işbu yedimde olan sûret-i emr-i âlîde musarrahan tastîr olunduğu üzere Âsitâne-i aliyye’de vâki‘ Saray-ı cedîd ve atîk-i hümâyûn ve benât-ı selâtîn-i i‘zâm ve Dergâh-ı mu‘allâm yeniçerileri ve cebeci ve topçu ve sâir esnâf-ı askeriyenin rûz-ı merre verilecek ta‘yînâtları için Rumeli cânibinden iştirâ ve Âsitâne-i aliyye’ye sevk ve tesyîr olunan ağnâm ve ağnâm misillüden Âsitâne-i sa‘âdet’e gelirken bi’l-iktizâ kışlaklarda meks ve yol üzerlerinde olan âdet-i ağnâm tahsîldârları sahîh mîrî koyundan rüsûm talebinden bâ-fermân-ı âlî men‘ ve nehy olunmalarıyla ber-vech-i muharrer müdde‘î-i merkūmun matlûbu olan âdet-i ağnâm rüsûmu müvekkilim mûmâ-ileyhin yedinde olan sahîh mîrî ağnâmı resmi olmağla ber-mûceb-i emr-i âlî vermez deyü müdde‘î-i mezbûrun müdde‘âsını bi’l-vekâle def‘ eyledikden sonra yedinde olup takrîr-i meşrûhuna mutâbık ibrâ eylediği bir kıt‘a sûret-i emr-i âlî dahi vech-i mezkûr üzere men‘ ve nehy olunduğunu nâtık olmağla müdde‘î-i merkūm Mustafa Ağa’nın müdde‘âsı mugāyir-i emr-i Sultânî olduğuna binâen müdde‘î-i merkūm Mustafa Ağa husûs-ı mezkûr için müvekkil-i [mûmâ]ileyh Kasabbaşı Halil Ağa’dan hilâf-ı emr-i âlî mutâlebe eylediği sahîh mîrî koyun âdet-i ağnâmı nâmıyla bî-vech mu‘ârazadan men‘ eylediğini mevlânâ-yı mezbûr mahâllinde ketb ü tahrîr ve ba‘dehu meclis-i şer‘a gelip alâ-vukū‘ihî inhâ ve inbâ eylediği huzûr-ı âlîlerine i‘lâm olundu. Fî 23 Cemâziyelâhire sene 1171.