Bab Mahkemesi 54 Numaralı Sicil (H. 1102 / M. 1691) cilt: 20, sayfa: 387 Hüküm no: 473 Orijinal metin no: [83a-2] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Ayşe bt. Abdullah’ın vasiyeti Husûs-ı âti’l-beyânın mahallinde ketb ü tahrîri iltimâs olunmağın, kıbel-i şer‘den irsâl olunan Mehmed Efendi b. Hasan mahmiye-i İstanbul’da el-Hâc Hasan mahallesinde sâkine Ayşe bt. Abdullah nâm hâtunun sâkine olduğu menziline varıp, zeyl-i kitâbda muharrerü’l-esâmi müslimîn huzûrunda akd-i meclis-i âlî eyledikde, mezbûre Ayşe Hâtun ba‘de’t-ta‘rîfi’ş-şer‘î meclis-i ma‘kūd-ı mezbûrda, zevci bâ‘isü hâze’l-kitâb Abdullah Efendi b. Bayram nâm kimesne mahzarında ikrâr ve takrîr-i kelâm edip, bi emrillâhi te‘âlâ vefât eylediğimde mehr-i müeccelim olan bin beş yüz akçe ve sâir eşyâ-i memlûkemden iskāt-ı salât için kifâyet mikdâr harc ve sarf olundukdan sonra tereke-i vâfiyemden bir Mushaf-ı şerîf ifrâz ve vakfolunup zevcim mezbûr Abdullah Efendi kırâ’at eyleye, mâ‘adâ mehr ve sâir ism-i mâl ıtlâk olunur eşyâmın cümle âhar vârisim olmamağla zevcim mezbûr Abdullah Efendi’nin olsun deyu vasiyyet edip, tenfîzine yine mezbûr Abdullah Efendi’yi vasiyy-i muhtâr nasb ve ta‘yîn eyledim dedikde, ol dahi vesâyet-i mezbûreyi kabûl ve merâsimini kemâ-yenbağī edâya ta‘ahhüd etmeğin, vâki‘ hâli Mevlânâ-yı mezbûr mahallinde tahrîr, ba‘dehû ma‘an ba‘s olunan Ahmed Hayri b. Süleyman ile meclis-i şer‘a gelip alâ vukū‘ihî inhâ ve takrîr etmeğin, mâ hüve’l-vâki‘ bi’t-taleb ketb olundu. Fi’l-yevmi’s-sâmin ve’l-ışrîn min Cumâdelâhire li sene isneteyn ve mi’e ve elf. Şuhûdü’l-hâl: Ahmed Efendi b. Osman, Halil Çelebi b. Abdullah, Abdullah Efendi [b.] Receb, Mehmed b. Mehmed, Osman b. Ali, Berber Ali Çelebi b. ( ).