Bab Mahkemesi 54 Numaralı Sicil (H. 1102 / M. 1691) cilt: 20, sayfa: 388 Hüküm no: 474 Orijinal metin no: [83a-3] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Ayşe bt. Abdullah’ın Ahmed Çelebi b. Yusuf’tan muhâlaa yoluyla boşanması Mahmiye-i İstanbul’da Hatice Sultan mahallesi sâkinelerinden olup zâtını [ma‘rifet-i] şer‘iyye ile ârifân olan Mehmed b. Mustafa ve İvaz b. Abdullah ta‘rîfleriyle mu‘arrefe olan Ayşe bt. Abdullah nâm hâtun meclis-i şer‘-i şerîf-i enver ve mahfil-i dîn-i münîf-i ezherde, zevc-i dâhili bâ‘isü hâze’l-kitâb Ahmed Çelebi b. Yusuf mahzarında ikrâr-ı tâm ve takrîr-i kelâm edip, mezbûr zevcim olup beynimizde hüsn-i zindegânemiz olmamağla, zimmetinde mütekarrir ve ma‘kūdun-aleyh olan bin akçe mehr-i müeccelim ve nafaka-i iddet-i mu‘ayyene-i ma‘lûmem üzerine ve me’ûnet-i süknâm dahi kendi üzerime olmak üzre eşyâ-i memlûkemden bir köhne beledî döşek ve bir köhne minder ve iki köhne beledî yasdık ve bir sagīr tenceremi dahi bedel-i sulh olmak üzre zevcim mezbûr Ahmed ile muhâla‘a-i sahîha-i şer‘iyye ile muhâla‘a edip, ol dahi ber vech-i muharrer hul‘-ı mezbûru kabûl ettiğinden sonra hukūk-ı zevciyyete ve bedel-i hul‘ deyu medfû‘um olan mârru’z-zikr eşyâya ve târih-i kitâba gelince sâir hukūka müte‘allika âmme-i da‘vâdan her birimiz âharın zimmetini ibrâ-i âmm-ı kātı‘ü’n-nizâ‘la ibrâ ve iskāt edip, fîmâ-ba‘d birbirimiz ile da‘vâ ve nizâ‘ımız kalmadı dedikde, gıbbe’t-tasdîk mâ vaka‘a bi’t-taleb ketb olundu. Fi’l-yevmi’s-sâmin ve’l-ışrîn min Cumâdelâhire li sene isneteyn ve mi’e ve elf. Şuhûdü’l-hâl: Veli Efendi b. Mehmed el-müezzin, Mehmed b. Hasan, Ali b. Bâli, İbrahim Çelebi b. Ahmed, Mahmud b. Ahmed, Hüseyin [b.] Mustafa, Mustafa b. Şaban, Ahmed b. Ahmed.