Bab Mahkemesi 54 Numaralı Sicil (H. 1102 / M. 1691) cilt: 20, sayfa: 389 Hüküm no: 476 Orijinal metin no: [83a-5] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Ali b. Abdullah’ın küçük oğlu İbrahim’e nafaka ödemesi Mahmiye-i İstanbul’da Manisalı Çelebi mahallesinde sâkine bâ‘isetü hâze’l-kitâb Müstakīme bt. Abdullah nâm hâtun ba‘de’t-ta‘rîfi’ş-şer‘î meclis-i şer‘-i şerîf-i enverde, Ali b. Abdullah nâm kimesne mahzarında takrîr-i kelâm ve ta‘bîr ani’l-merâm edip, mezbûr Ali sulbî sagīr oğlu işbu hâzır bi’l-meclis İbrahim nâm sagīri hâdinesi olmamağla, terbiye ve infâk için rızâsıyla bana teslîm, ben dahi ber vech-i muharrer ahz u kabz etmekle, hâlâ kıbel-i şer‘den sagīr-i mezbûrun nafaka ve kisve ve sâir levâzım-ı zarûriyyesi için babası mezbûr Ali üzerine muvâcehesinde kadr-i ma‘rûf nafaka farz ve takdîr olunmak matlûbumdur dedikde, gıbbe’t-tasdîki’ş-şer‘î hâkim-i muvakki‘-i sadr-ı kitâb -tûbâ lehû ve hüsnü me’âb- hazretleri dahi sagīr-i mezbûrun nafaka ve kisve ve sâir levâzım-ı zarûriyyesi için babası mezbûr Ali [83b] üzerine rızâsıyla külli yevm beşer akçe farz ve takdîr edip, meblağ-ı mefrûz-ı mezbûru sagīr-i mezbûrun nafaka ve kisve ve sâir levâzım-ı zarûriyyesine harc ve sarfa ve lede’l-iktizâ istidâneye ve vaktü’z-zaferde babası mezbûr Ali üzerine rücû‘a mezbûre Müstakīme Hâtun’a izin vermeğin, mâ vaka‘a bi’t-taleb ketb [olundu.] Fî selh-i Cumâdelâhire sene 1102. Şuhûdü’l-hâl: İbrahim Çelebi b. Ahmed, İsmail Çelebi b. Mehmed, Mustafa Çelebi b. Şaban, Mustafa Çelebi b. Hasan, Ali b. Bâli.