Bab Mahkemesi 54 Numaralı Sicil (H. 1102 / M. 1691) cilt: 20, sayfa: 390 Hüküm no: 477 Orijinal metin no: [83b-1] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Hüseyin Çelebi b. Abdullah’ın boşadığı hamile karısı Fâtıma bt. Abdullah’a nafaka ödemesi Mahmiye-i İstanbul’da Tokludede mahallesinde sâkine olup, merhûm Musâhib Mustafa Paşa’nın ümm-i veledinden olan Fâtıma bt. Abdullah nâm hâtun ba‘de’t-ta‘rîfi’ş-şer‘î meclis-i şer‘-i şerîf-i enverde takrîr-i kelâm ve ta‘bîr ani’l-merâm edip, gāib ani’l-meclis mûsirînden Hüseyin Çelebi b. Abdullah mukaddemâ beni tezevvüc ve duhûl ettiğinden sonra târih-i kitâbdan iki ay mukaddem beni tatlîk etmeğin, hâlâ mezbûrun firâşından hamlim zuhûr etmekle vaz‘-ı haml ile iddetim inkızâsına dek mezbûrun üzerine kadr-i ma‘rûf nafaka takdîr olunmak matlûbumdur dedikde, hâkim-i muvakki‘-i sadr-ı kitâb -tûbâ lehû hüsnü me’âb- efendi hazretleri ba‘de’l-istihbâr mezbûrenin ber vech-i mezkûr vaz‘-ı haml ile iddeti münkaziye oluncaya değin zevc-i mutallıkı mezbûr Hüseyin Çelebi üzerine târih-i kitâbdan beher yevm on beş akçe farz ve takdîr edip, meblağ-ı mezbûru levâzım-ı şer‘iyyesine harc u sarfa ve lede’l-iktizâ istidâneye ve hîn-i zaferde mezbûra rücû‘a izin vermeğin, mâ-vaka‘a bi’t-taleb ketb olundu. Fi’l-yevmi’s-sâbi‘ ve’l-ışrîn min Cumâdelâhire li sene 1102. Şuhûdü’l-hâl: Sâlih Beşe b. Mehmed, İbrahim Çelebi b. Ahmed, Mehmed, Hüseyin Çelebi b. ( ), Osman b. Hasan, Ali b. Bâli.