Rumeli Sadâreti Mahkemesi 272 Numaralı Sicil (H. 1171-1172/ M. 1758) cilt: 74, sayfa: 142 Hüküm no: 121 Orijinal metin no: [22a-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Ebubekir’in Harput kadısı Kayyımzade Ahmed Efendi aleyhindeki alacak davası ile Naib Mehmed Efendi’nin vekili olduğuna dair iddiasının kabul olunmadığı Ma‘rûz, Ekrâd tâifesinden es-Seyyid Ebubekir mahfil-i şer‘iyyâtda sâbıkā Harput kādısı sâhib-i arzuhâl Kayyımzâde Ahmed Efendi muvâcehesinde mezbûr Ahmed Efendi bin yüz altmış sekiz senesi Rebî‘ülâhiri gurresinden zabt etmek üzere mutasarrıf olduğu Harput kazâsının niyâbetini yine Harput ahâlîsinden Mehmed Efendi b. Feyzullah b. Mehmed nâm kimesneye tefvîz eyledikde işbu hâzır bi’l-meclis es-Seyyid el-Hâc Yasin yediyle bir def‘a beher şehr altmışar guruşdan altı aylık üç yüz altmış guruş ve bir def‘a dört yüz on iki guruş ki cem‘an yedi yüz yetmiş iki guruşunu ahzedip ancak altı ay zabt edip azletmekle def‘a-i sâniyede medfû‘u olan meblağ-ı mezbûr dört yüz on iki guruşu merkūm Ahmed Efendi’den taleb ve da‘vâ ve ahz u kabza ve kendüye îsâle mezbûr Mehmed Efendi tarafından beni vekîl etmekle meblağ-ı mezbûru mezbûr Ahmed Efendi’den bi’l-vekâle taleb ederim deyü da‘vâ ve mezbûr Ahmed Efendi cevâbında def‘a-i sâniyede olan meblağ-ı mezbûr dört yüz on iki guruşu ber-vech-i muharrer kabzını külliyen münkir olduğundan gayrı mezbûr es-Seyyid Ebubekir’in vekâlet da‘vâsında ve husûs-ı mezkûrda tezvîr ve ızrâr ve ta‘cîz fehm olunmağla asîl-i mezbûr Mehmed Efendi’nin bi-nefsihî veyâhud tarafından cihet-i şer‘iyye ile mu‘temedün-aleyh bir vekîlin mecî’ine tevkīf olunup mezbûr es-Seyyid Ebubekir’in vekâlet da‘vâsına iltifât olunmadığı huzûr-ı âlîlerine i‘lâm olundu. Ma‘lûm-ı devletleri buyuruldukda emr ü fermân hazret-i veliyyü’l-emrindir. Fî 6 Şa‘bân sene 1171.