Rumeli Sadâreti Mahkemesi 272 Numaralı Sicil (H. 1171-1172/ M. 1758) cilt: 74, sayfa: 143 Hüküm no: 122 Orijinal metin no: [22a-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Hacı Hasan’ın, Çerkes Hasan Ağa’nın Kethüdası Mehmed Ağa aleyhindeki alacak davasında haksız olduğu Ma‘rûz, Vilâyet-i Anadolu’da Burunâbad kazâsı ahâlîsinden sâhib-i arzuhâl el-Hâc Hasan derûn-ı arzuhâlde mezkûrü’l-ism Mehmed Ağa ile bi’t-terâzî mahfil-i şer‘iyyâtda terâfu‘larında mezbûr el-Hâc Mehmed sâbıkā kazâ-i mezbûr voyvodası olan gāib ani’l-meclis Çerkes Hasan Ağa’nın kethüdâsı olmağla bundan akdem malımdan ve yedimden yetmiş yedi guruş ile yüz yirmi bir guruş kıymetli altmış keyl buğday, on bir guruş kıymetli otuz yük samanı ahz ve istihlâk etmekle nakd-i mezbûr ile zikr olunan buğdayı ve samanın emsâlini mezbûr Mehmed Ağa’dan hâlâ taleb ederim deyü ba‘de’d-da‘vâ ve’l-istintâk mezbûr Mehmed Ağa cevâbında işbu târîh-i i‘lâm-ı şehrî Şa‘bânı’nın gurresinde İstanbul Bâb nâibi müderrisînden Mustafa Efendi huzûrunda nakd-i mezkûr ile buğday ve samanın emsâlini benden da‘vâ etdikde ben dahi târîh-i i‘lâmdan bir sene mukaddem nakd-i mezkûr ile buğday ve samanı benden mutâlebe ve beynimizde ba‘de vukū‘i’l-münâza‘a vesâtet-i muslihîn ile yirmi beş guruş bedel-i makbûza sulh olup husûs-ı mezkûra müte‘allika da‘vâdan benim zimmetimi ibrâ ve iskāt etmiş idi deyü eylediğim def‘imi nâib-i mûmâ-ileyhin huzûrunda Mehmed Emin Ağa b. Hasan ve Bostanî Osman b. Fazlullah nâm şâhidân-ı mu‘addilân şehâdetleriyle muvâcehesinde vech-i şer‘î üzere isbât eylediğimde müdde‘î-i mezbûr el-Hâc Hasan husûs-ı mezkûr için bana bî-vech mu‘ârazadan men‘ olunmuş idi deyü takrîri mazmûnuna mutâbık bir kıt‘a i‘lâm-ı şer‘î ibrâzıyla ba‘de’d-def‘ ve’l-inkâr dâfi‘-i merkūm Mehmed Ağa ber-vech-i muharrer def‘ini makbûlü’ş-şehâde olan Muhzır Eyüb b. Ali ve Mustafa b. Ali nâm kimesneler şehâdetleriyle muvâcehesinde vech-i şer‘î üzere isbât etmeğin mûcebiyle müdde‘î-i mezbûr el-Hâc Hasan husûs-ı mezkûr için merkūm Mehmed Ağa’ya bi-gayr-ı vech-i şer‘î mu‘ârazadan men‘ olunduğu huzûr-ı âlîlerine i‘lâm olundu. Fî 7 Şa‘bân sene 1171.