Rumeli Sadâreti Mahkemesi 272 Numaralı Sicil (H. 1171-1172/ M. 1758) cilt: 74, sayfa: 143 Hüküm no: 123 Orijinal metin no: [22b-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Çukadar Mehmed Ağa’nın Ali Ağa aleyhindeki alacak davasında anlaşma sağlanması Ma‘ruz, Sâhib-i arzuhâl Çukadâr Mehmed Ağa mahfil-i şer‘iyyâtda derûn-ı arzuhâlde mezkûrü’l-ism es-Seyyid Ali Ağa mahzarında merkūm es-Seyyid Ali Ağa zimmetinde cihet-i karz-ı şer‘îden iki yüz guruş hakkım olmağla meblağ-ı mezbûru bundan akdem merkūmun vilâyet-i Anadolu’da Lazkiye kazâsında hizmetinde iken beni bi-gayr-ı hakkın ahz ve kasaba-i mezbûre kal‘asından aşağı atıp başım ve kollarım ve belim mecrûh edip hâlâ cerh-i mezkûruma ber-i tâm hâsıl olup lâkin, curûh-ı mezkûrun tesîrinden nâşî vücûdumda hâdis eseri kalmağla mûceb-i şer‘îsini merkūm es-Seyyid Ali Ağa’dan hâlâ taleb ederim deyü tasaddî eylediği da‘vâsından bâ-vesâtet-i muslihîn an-inkâr merkūm es-Seyyid Ali Ağa ile elli guruş bedel-i makbûza sulh olup meblağ-ı mezkûrun mâ‘adâsına ve curûh-ı mezkûrumun eserlerine ve târîh-i i‘lâma gelince sâir hukūk-ı şer‘iyyeye müte‘allika âmme-i da‘vâdan merkūm es-Seyyid Ali Ağa’nın zimmetini ibrâ-i âm ile ibrâ ve iskāt edip ol dahi bedel-i sulh olmak üzere medfû‘u olan meblağ-ı mezbûr elli guruşa ve sâire müte‘allika âmme-i da‘vâdan mezbûr Mehmed Ağa’nın zimmetini ibrâ-i âm ile ibrâ ve iskāt edip ve her biri âharın ibrâsını kabûlle kat‘-ı nizâ‘ etdikleri huzûr-ı âlîlerine i‘lâm olundu. Fî 8 Şa‘bân sene 1171.