Rumeli Sadâreti Mahkemesi 272 Numaralı Sicil (H. 1171-1172/ M. 1758) cilt: 74, sayfa: 144 Hüküm no: 124 Orijinal metin no: [22b-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Eğinli Osmanın varislerinden Ayşe ve Ali’nin Sarraf Kazer aleyhindeki alacak davaları Bâ-mühr-i hazret-i efendi, Ma‘rûz, Müteveffâ Eğinli Osman’ın veresesinden sâhibeyi arzuhâl zevcesi Âişe ve sulbî kebîr oğlu Ali derûn-ı arzuhâlde mesfûrü’l-ism Sarrâf Kazer ile Rumeli kādıaskeri esbak semâhatlü Ahmed Efendi dâ‘îlerinin Dîvân-ı âlîlerinde akdeylediği meclis-i şer‘-i münîrde terâfu‘larında mûrisleri müteveffâ-yı mezbûr Eğinli Osman’ın sarrâf-ı mesfûr Kazer’de vedî‘ası olmak üzere dört bin altı yüz altmış guruşunu her biri da‘vâ ve mesfûr Kazer dahi cevâbında meblağ-ı mezbûr dört bin altı yüz altmış guruşu ikrâr, lâkin hükm-i hâkimü’ş-şer‘le müteveffâ-yı mezbûrun veresesine îsâle vasiyy-i muhtârı ve karındaşı Hüseyin’e tamâmen edâ ve teslîm eylediğini vech-i şer‘î üzere isbât edip mezbûretân Âişe ve Ali husûs-ı mezkûra müte‘allika da‘vâdan mesfûr Kazer’e bî-vech mu‘ârazadan men‘ olunduklarını müşârün-ileyh Ahmed Efendi dâ‘îlerinin bir kıt‘a i‘lâm-ı şer‘îleri nâtık ve ba‘dehu hâlâ Şeyhülislâm-ı sellemehü’s-selâm inâyetlü semâhatlü Mehmed Salih Efendi hazretlerinin Rumeli sadâretinde tekrâr terâfu‘-ı şer‘ olduklarında kādıasker-i müşârün-ileyh Ahmed Efendi dâ‘îlerinin sâlifü’l-beyân verdiği i‘lâm-ı şer‘înin mazmûnunu sarrâf-ı mesfûr Kazer mezbûrân Âişe ve Ali muvâcehelerinde isbât edip tekrâr bî-vech mu‘ârazadan men‘ olunduklarını müşârün-ileyh Mehmed Salih Efendi hazretlerinin dahi i‘lâm-ı şer‘îleri nâtık olduğu ma‘lûm-ı devletleri buyuruldukda fermân men-lehü’l-emr hazretlerinindir. Fî 9 Şa‘bân sene 1171.