Rumeli Sadâreti Mahkemesi 272 Numaralı Sicil (H. 1171-1172/ M. 1758) cilt: 74, sayfa: 145 Hüküm no: 125 Orijinal metin no: [22b-3] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Nallıhan kasabasındaki Hacı Mehmed Medresesi müderrisi Ahmed Efendi’nin müderrislik görevini Süleyman Efendi’ye devretmesi Ma‘rûz, Korupazar kasabasına tâbi‘ Nallıhan kasabasında vâki‘ el-Hâc Mehmed nâm sâhibü’l-hayrın binâ eylediği medresenin bâ-işâret-i aliyye ve bâ-berât-ı âlîşân vazîfe-i mu‘ayyene ile müderrisi olduğu Ahmed Efendi b. İbrahim ve es-Seyyid Osman Efendi b. Hüseyin ve es-Seyyid Molla Ahmed b. Ali ve Ahmed Efendi b. Mehmed ihbârlarıyla mütehakkık olan Ahmed Efendi b. Mehmed mahfil-i şer‘iyyâtda kasaba-i mezbûre ahâlîsinden bâ‘is-i i‘lâm es-Seyyid Süleyman Efendi b. Halil’in vekîl-i şer‘îsi es-Seyyid Ahmed Efendi muvâcehesinde işbu yedimde olan berât-ı âlî-kadrde tasrîh olunduğu üzere mutasarrıf olduğum müderrislik cihetimi kendi hüsn-i rızâ ve ihtiyârım ve ferâğ-ı mu‘teber-i kat‘î ile müvekkil-i mezbûr Süleyman Efendi’ye ferâğ ve kasr-ı yed eylediğimde ol dahi tefevvüz ve kabûl etmekle fîmâ-ba‘d cihet-i mezkûrede benim kat‘an alâka ve medhalim kalmayıp mezbûr es-Seyyid Süleyman Efendi’nin dâhil-i havza-i tasarrufu olmuşdur deyü ikrâr ve vekîl-i mezbûr dahi tasdîk etmekle fâriğ-i mezbûrun kasr-ı yedinden müvekkil-i mezbûr es-Seyyid Süleyman Efendi’ye tevcîh ve yedine berât-ı âlîşân inâyet ve ihsân buyurulmak ricâsında oldukları huzûr-ı âlîlerine i‘lâm olundu. Fî 9 Şa‘bân sene 1171.