Rumeli Sadâreti Mahkemesi 272 Numaralı Sicil (H. 1171-1172/ M. 1758) cilt: 74, sayfa: 145 Hüküm no: 126 Orijinal metin no: [22b-4] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. İstanbul Vezir Hanı sarrâflarından Kazer, Markos ve Kirkor’un İskenderiye Mutasarrıfı Ömer Paşa’ya olan alacaklarının tahsil olunması Bâ-mühr-i hazret-i efendi, Ma‘rûz, İstanbul’da Vezir Hanı sarrâflarından derûn-ı arzuhâlde mezkûrûnü’l-ism Kazer ve Markos ve Kirkor nâm şerîkler meclis-i şer‘-i münîrde sâhib-i arzuhâl sâbıkā İskenderiye mutasarrıfı emîr-i ümerâi’l-kirâm Ömer Paşa b. Hüseyin Ağa mahzarında bin yüz altmış iki senesi Saferi’l-hayrı’nın on beşinci gününden bin yüz altmış sekiz senesi Zilhiccesi gurresine gelince mûmâ-ileyh Ömer Paşa’nın bi-şartı’r-rücû‘ emriyle umûr ve husûslarına kendi mâl-ı şirketimizden masrûfumuzun hesâbını [23a] gurre-i merkūmede kendi ile beynimizde hesâb-ı sahîh ile rü’yet eylediğimizde mecmû‘ masrûfumuz kırk bir bin guruşa bâliğ olmağla mûmâ-ileyh Ömer Paşa makbûl edip kat‘an zimmetinde bize deyni olmak üzere ikrâr ve işbu bir kıt‘a deyn temessükünü yedimize i‘tâ eyledikden sonra meblağ-ı mezkûrun bir def‘a dört bin altı yüz kırk altı buçuk guruşunu ve bir def‘a iki bin iki yüz guruşunu ba‘de’l-ahz ve’l-istîfâ bâkī kalan otuz dört bin yüz elli altı buçuk guruşu işbu bir kıt‘a hüküm hücceti nâtıka olduğu üzere bin yüz yetmiş senesi Saferi’l-hayrı’nın onuncu günü ol vakitde şer‘iyyâtî müderrisîn-i kirâmdan es-Seyyid Abdullah Efendi huzûrunda mûmâ-ileyh Ömer Paşa’dan da‘vâ eylediğimizde ol dahi hesâb-ı sahîh ve kat‘an ikrâr vukū‘unu ve meblağ-ı bâkī-i mezkûr zimmetinde bize edâsı vâcib deyni olduğunu ikrâr edip edâsıyla ilzâm olundukdan sonra üç bin sekiz yüz guruşu dahi bize edâ, biz dahi ahzetmiş idik. Bâkī kalan otuz bin üç yüz elli üç buçuk guruşu dahi hâlâ taleb ederiz deyü da‘vâ etdiklerinde mûmâ-ileyh Ömer Paşa cevâbında müdde‘ûn-ı mesfûrûnun ber-minvâl-i muharrer müdde‘âlarını ikrâr ü i‘tirâf edip lâkin gurre-i merkūmede ikrârım muvâza‘aten olmuş idi deyü tasaddî eylediği muvâza‘a da‘vâsı müdde‘ûn-ı mesfûrûnun yedlerinde olup ibrâz eyledikleri fetvâ-yı şerîfe mûcebince mesmû‘a olmayıp mûmâ-ileyh Ömer Paşa meblağ-ı bâkī-i mezkûr otuz bin üç yüz elli üç buçuk guruşun kemâ-fi’l-evvel edâsıyla ilzâm olunduğu huzûr-ı âlîlerine i‘lâm olundu. Fî 9 Şa‘bân sene 1171.