Rumeli Sadâreti Mahkemesi 272 Numaralı Sicil (H. 1171-1172/ M. 1758) cilt: 74, sayfa: 146 Hüküm no: 127 Orijinal metin no: [23a-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Mehmed Ağa’ya olan borcunu ödemesi hususunda Süleyman Reis’e tenbih olunması Ma‘ruz, Mahmiye-i İstanbul’da Sarıgez (Sarıgörez) kurbünde sâkin bâ‘is-i i‘lâm el-Hâc Mehmed Ağa b. Ali mahfil-i şer‘iyyâtda Tophânede Salıpazarı’nda sâkin el-Hâc Süleyman Reis b. el-Hâc Hasan muvâcehesinde bin yüz yetmiş senesi Receb-i şerîfinin on altıncı günü târîhiyle müverrah işbu deyn temessükü mantûkunca gāibân ani’l-beled tüccârdan Küçük Mehmed b. el-Hâc Hüseyin b. Abdullah ve el-Hâc Hasan Reis b. Hüseyin b. Ali zimmetlerinde ber-vech-i iştirâk cihet-i karzdan sekiz yüz on guruş hakkım olup mezbûr el-Hâc Süleyman Reis meblağ-ı mezbûrun bana edâsına bi’l-emr ve’l-kabûl bâ-kefâlet-i sahîha-i şer‘iyye ile kefîl ve zâmin olmağla otuz sekiz guruşunu kefâletine binâen yedinden ahzetmiş idim. Hâlâ bâkī kalan yedi yüz yetmiş iki guruşu ber-vech-i muharrer kefâletine binâen mezbûre el-Hâc Süleyman Reis’den taleb ederim deyü da‘vâ etdikde mezbûr el-Hâc Süleyman Reis dahi fi’l-hakīka kaziyye minvâl-i muharrer [üzere] olduğunu tâyi‘an ikrâr ü i‘tirâf etmeğin alâ-mûcibi i‘tirâfihî meblağ-ı bâkī-i mezbûr yedi yüz yetmiş iki guruşu bi-hükmi’l-kefâle müdde‘î-i mezbûr el-Hâc Mehmed Ağa’ya edâ ve teslîme merkūm el-Hâc Süleyman Reis’e tenbîh olunduğu huzûr-ı âlîlerine i‘lâm olundu. Fî 10 Şa‘ban sene 1171.