Rumeli Sadâreti Mahkemesi 272 Numaralı Sicil (H. 1171-1172/ M. 1758) cilt: 74, sayfa: 147 Hüküm no: 128 Orijinal metin no: [23a-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Borçtan dolayı olan alacakların tecili caiz olmadığından borcunu hemen ödemesi hususunda Mustafa’ya tenbihte bulunulması Ma‘rûz, Arzuhâl eden Agob v. Harabin zimmî mahfil-i şer‘iyyâtda derûn-ı arzuhâlde mezkûrü’l-ism Hafız Mustafa Efendi b. Osman mahzarında bin yüz yetmiş bir senesi şehr-i Rebî‘ülevveli’nin gurresiyle müverrah işbu bir kıt‘a deyn temessükü mantûkunca mezbûr Hafız Mustafa Efendi zimmetinde cihet-i karzdan yüz elli guruş ve yedimden iştirâ ve kabz eylediği on top İstanbul şâlîsi bahâsından yüz guruş ki cem‘an iki yüz elli guruş hakkım olmağla meblağ-ı mezkûru mezbûr Hafız Mustafa Efendi’den hâlâ taleb ederim deyü da‘vâ ve mezbûr Hafız Mustafa Efendi cevâbında müdde‘î-i mesfûr Agob’un ber-minvâl-i muharrer müdde‘âsını ikrâr, lâkin müdde‘î-i mersûm Agob meblağ-ı mecmû‘-ı mezkûru gurre-i merkūmeden üç yüz altmış bir gün tamâmında kendüye edâ etmek üzere te’cîl, ben dahi kabûl etmiş idim. Eceli hulûlünde edâ ederim deyü eylediği te’cîl da‘vâsını mesfûr Agob zimmî ikrâr edip lâkin karz olan meblağ-ı mezkûr yüz elli guruşda te’cîl sahîh olmamağla alâ-mûcibi i‘tirâfihî karz olan meblağ-ı mezkûr yüz elli guruşu hâlâ ve semen-i mebî‘ olan meblağ-ı mezkûr yüz guruşu ecel-i hulûlünde müdde‘î-i mesfûr Agob zimmîye edâ ve teslîme mezbûr Hafız Mustafa Efendi’ye tenbîh olunduğu huzûr-ı âlîlerine i‘lâm olundu. Fî 9 Şa‘bân sene 1171.