Rumeli Sadâreti Mahkemesi 272 Numaralı Sicil (H. 1171-1172/ M. 1758) cilt: 74, sayfa: 147 Hüküm no: 129 Orijinal metin no: [23b-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Helvacı İsmail’in kefalet davasından vazgeçmesi Ma‘rûz Sâhib-i arzuhâl Bostanî Helvacı İsmail b. İsmail mahfil-i şer‘iyyâtda derûn-ı arzuhâlde mezkûrü’l-ism Bogasici es-Seyyid Mehmed b. el-Hâc Mehmed mahzarında bin yüz yetmiş senesi Cumâdelâhiresi’nin yirmi altıncı günü gāib ani’l-beled Denizlili el-Hâc Ali nâm kimesneye bâ-temessük malımdan ikrâz ve teslîm, ol dahi yedimden iktirâz ve kabz edip kendi masârıfına sarfla istihlâk eylediği yedi yüz yetmiş iki guruşun edâsına mezbûr es-Seyyid Mehmed târîh-i i‘lâmdan yirmi iki gün mukaddem kefîl ve zâmin olmağla meblağ-ı mezkûru kefâletine binâen mezbûr es-Seyyid Mehmed’den hâlâ taleb ederim deyü ba‘de’d-da‘vâ ve’l-inkâr müdde‘î-i mezbûr Helvacı İsmail gāib-i mezbûr el-Hâc Ali’nin babası ve dedesi isimlerini ta‘yîne kādir olmayıp da‘vâsında tezvîr fehm olunduğundan mâ‘ada mezbûr Helvacı İsmail kefâlet-i mezkûre da‘vâsından meccânen fâriğ ve keff-i yed edip kefâlet-i mezkûreye ve bi’l-cümle husûs-ı mezkûra müte‘allika âmme-i de‘âvî ve kâffe-i mutâlebâtdan mezbûr es-Seyyid Mehmed’in zimmetini ibrâ-i âm ile ibrâ ve iskāt edip ol dahi ibrâsını kabûlle kat‘-ı nizâ‘ etdikleri huzûr-ı âlîlerine i‘lâm olundu. Fî 10 Şa‘bân sene 1171.