Bab Mahkemesi 54 Numaralı Sicil (H. 1102 / M. 1691) cilt: 20, sayfa: 401 Hüküm no: 491 Orijinal metin no: [86a-3] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Mahmud b. Mehmed üzerine küçük kızı Fâtıma için nafaka takdiri Mahmiye-i İstanbul’da Derviş Ali mahallesinde sâkine olup zâtını ma‘rifet-i şer‘iyye ile ârifân Süleyman b. Ömer ve Ali b. Bâli ta‘rîfleriyle mu‘arrefe olan bâ‘isetü hâze’l-kitâb Gonca bt. Abdullah nâm hâtun meclis-i şer‘-i şerîf-i enver ve mahfil-i dîn-i münîf-i ezherde, zevc-i mutallıkı işbu hâzır bi’l-meclis Mahmud b. Mehmed mahzarında takrîr-i kelâm edip, mezbûr Mahmud zevcim olup târih-i kitâbdan üç gün mukaddem beni bâyinen tatlîk etmekle, mezbûrun firâşından hâsıla ve benden mütevellide sadriye sagīre kızım Fâtıma’ya kıbel-i şer‘den kadr-i ma‘rûf nafaka farz ve takdîr olunmak matlûbumdur dedikde, hâkim-i muvakki‘-i sadr-ı kitâb -tûbâ lehû ve hüsnü me’âb- hazretleri dahi târih-i kitâbdan yevmî beşer akçe farz ve takdîr edip, meblağ-ı mefrûz-ı mezbûru sagīre-i mezbûrenin nafaka ve kisve ve sâir levâzım-ı mühimmesine harc u sarfa ve lede’l-iktizâ istidâneye ve inde’z-zafer babası mezbûr Mahmud üzerine rücû‘a mezbûre Gonca Hâtun’a izin vermeğin, mâ vaka‘a bi’t-taleb ketb olundu. Fî gurre-i Recebi’l-ferd li seneti 1102. Şuhûdü’l-hâl: İbrahim Çelebi b. Ahmed, Mahmud b. Hasan, Ali b. Bâli, Süleyman Çelebi b. Ömer, Hüseyin b. Mustafa