Bab Mahkemesi 54 Numaralı Sicil (H. 1102 / M. 1691) cilt: 20, sayfa: 401 Hüküm no: 492 Orijinal metin no: [86b-1] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Mehmed b. Yusuf üzerine küçük çocukları Mustafa ve Havva için nafaka takdiri Mahmiye-i İstanbul’da Müfti Ali Çelebi mahallesinde sâkine Fâtıma bt. Abdullah nâm hâtun meclis-i şer‘-i şerîf-i enverde, zevc-i sâbıkı Mehmed b. Yusuf nâm kimesne mahzarında takrîr-i kelâm ve ta‘bîr ani’l-merâm edip, bundan akdem mezbûr Mehmed beni bâyinen tatlîk etmişdi, lâkin mezbûr Mehmed’in firâşından hâsıl ve benden mütevellid Mustafa ve Havva nâm sagīrleri babaları mezbûr Mehmed üzerine rızâsıyla kadr-i ma‘rûf nafaka farz ve takdîr olunmak matlûbumdur dedikde, hâkim-i muvakki‘-i sadr-ı kitâb -tûbâ lehû ve hüsnü me’âb- hazretleri dahi târih-i kitâbdan babaları mezbûr Mehmed üzerine bi’t-terâzî beher yevm beherine üçer akçe cem‘an yevm altı [akçe] sagīrân-ı mezbûrânın nafaka ve kisveleri için farz ve takdîr olundukdan sonra meblağ-ı mezbûr-ı mefrûzu sagīrân-ı mezbûrânın nafaka ve kisve ve sâir levâzım-ı zarûriyyelerine harc u sarfa ve lede’l-iktizâ istidâneye ve inde’z-zafer mezbûr Mehmed üzerine rücû‘a mezbûr Fâtıma Hâtun’a izin vermeğin, mâ vaka‘a bi’t-taleb ketb olundu. Fi’l-yevmi’s-sâmin ve’l-ışrîn min Cumâdelâhire li sene isneteyn ve mi’e ve elf. Şuhûdü’l-hâl: İbrahim Çelebi b. Ahmed, Receb Efendi b. Mahmud, Mehmed Efendi b. Hasan, Mustafa b. Şaban ve Mehmed b. Zülfikar ve gayruhüm mine’l-huzzâr.