Bab Mahkemesi 54 Numaralı Sicil (H. 1102 / M. 1691) cilt: 20, sayfa: 402 Hüküm no: 494 Orijinal metin no: [86b-3] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Mustafa b. Ebûbekir’in menzilini 1. Yeniçeri Ağa Bölüğü Vakfı’na bey‘ bi’l-istiğlâl yoluyla satması Medîne-i Üsküdar muzâfâtından Karamürsel Nâhiyesi’ne tâbi‘ Ulaşlı nâm karye sükkânından Mustafa b. Ebûbekir nâm kimesne meclis-i şer‘-i şerîf-i enverde, Dergâh-ı âlî yeniçerilerinin birinci ağa bölüğüne mahsûs odanın nukūd-ı mevkūfesine bi’l-fi‘il mütevellî olan bâ‘isü hâze’l-kitâb el-Hâc Süleyman b. Mustafa nâm kimesne mahzarında ikrâr ve takrîr-i kelâm edip, akd-i âti’z-zikrin sudûruna değin yedimde mülk ve hakkım olup, karye-i mezbûrede vâki‘ bir tarafı Hâcı Mehmed oğlu Mustafa Yazıcı mülküne ve etrâf-ı selâsesi tarîk-i hâs ile mahdûd bir bâb fevkānî ve bir bâb tahtânî odaları ve kileri ve hadîka ve zât-ı eşcâr-ı müsmire ve gayr-ı müsmireyi müştemil mülk menzilimi, cümle tevâbi‘ ve levâhıkı ve kâffe-i hukūk ve merâfıkı ile mütevellî-i mezbûr el-Hâc Süleyman’a elli sekiz buçuk guruşu bi tarîki’l-istiğlâl bey‘ ve teslîm, ol dahi ber vech-i muharrer yedinde olan mâl-ı vakf-ı mezbûr ile iştirâ ve kabûl edip semeni olan meblağ-ı mezbûr elli sekiz buçuk guruşa mütevellî-i mezbûr el-Hâc Süleyman yedinden bi’t-tamâm ahz u kabz ettiğinden sonra menzil-i mezbûrun içinde mevcûd olan beynimizde ma‘lûm kalîl ü kesîr [ve] celîl ü hakīr eşyâmı mütevellî-i mezbûra ba‘de’l-îdâ‘ menzil-i mezbûru ve içinde olup kendiye îdâ‘ eylediğim eşyâ-i mezkûreyi kabza izin verdiğimde, ol dahi menzil-i merkūmu ve eşyâ-i mezkûreyi cemî‘an kabz ettiğinden sonra mütevellî-i mezbûr menzil-i mahdûd-ı mezkûru beher senesi sekizer guruş üçer rub‘ olmak üzre târih-i kitâbdan iki sene tamâmına değin on yedi buçuk guruşa bana îcâr ve teslîm, ben dahi minvâl-i muharrer üzre istîcâr ve tesellüm ve kabûl eyledim dedikde, gıbbe’t-tasdîki’ş-şer‘î mâ vaka‘a bi’t-taleb ketb olundu. Fi’l-yevmi’l-hâmis ve’l-ışrîn min Cumâdelâhire li sene isneteyn ve mi’e ve elf. Şuhûdü’l-hâl: Receb Beşe b. Abdullah, İsmail Beşe b. Ali, el-Hâc Lütfullah b. Ahmed, İbrahim Çelebi b. Ahmed, Ahmed Çelebi b. el-Hâc Mehmed, el-Hâc Mustafa b. Ahmed, Ali Beşe b. Musli, İbrahim b. Emrullah.