Bab Mahkemesi 54 Numaralı Sicil (H. 1102 / M. 1691) cilt: 20, sayfa: 403 Hüküm no: 495 Orijinal metin no: [86b-4] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Hatice bt. Mustafa’nın boşandığı mehir ve nafaka alacağını ödeyen kocası Ali Çelebi b. Mustafa’nın zimmetini ibra etmesi Mahmiye-i İstanbul’da Samanviran mahallesinde sâkine Hatice bt. Mustafa nâm hâtun meclis-i şer‘-i şerîfde, zevc-i mutallıkı bâ‘isü hâze’l-kitâb Ali Çelebi b. Mustafa nâm kimesne mahzarında ikrâr ve takrîr-i kelâm edip, zevcim mezbûr Mustafa beni târih-i kitâbdan iki gün mukaddem bâyinen tatlîk etmekle, mezbûr Mustafa zimmetinde ma‘kūdun-aleyh olan bin beş yüz akçe mehr-i müeccelim ve mezbûrun firâşından hâsıla ve benden mütevellide sadriye sagīre kızım Rukiye’nin nafaka-i mefrûzasından müctemi‘ olan yüz elli akçe ve nafaka-i iddet ve me’ûnet-i süknâm için dahi beş yüz elli akçe ki, cem‘an iki bin iki yüz akçeyi merkūm Ali Çelebi yedinden bi’t-tamâm ahz u kabz eylediğimden sonra mehr-i mezbûra ve hukūk-ı zevciyyete müte‘allika cemî‘-i da‘vâdan mezbûr Ali Çelebi’nin zimmetini ibrâ ve iskāt eyledim dedikde, gıbbe’t-tasdîki’ş-şer‘î mâ vaka‘a bi’t-taleb [ketb] olundu. Fi’l-yevmi’s-sânî min Recebi’l-ferd sene 1102. Şuhûdü’l-hâl: Halil Beşe b. ( ), Yahya Çelebi b. Ahmed, Mehmed Çelebi b. Halil, İvaz [b.] Süleyman.