Bab Mahkemesi 54 Numaralı Sicil (H. 1102 / M. 1691) cilt: 20, sayfa: 406 Hüküm no: 499 Orijinal metin no: [87b-1] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Papucubüyük Ömer Efendi b. Hacı Mehmed’in varislerinin tespiti Vilâyet-i Anadolu’da İznikmid Kazâsı’nda Urusluca mahallesi sâkinlerinden Mehmed ve Ahmed ibney Ebûbekir b. el-Hâc Mehmed b. Abdullah ile yine mahalle-i mezbûre sâkinlerinden Râziye Hâtun bt. el-Hâc Mehmed b. Abdullah tarafından husûs-ı âti’z-zikre vekîl olduğu zât-ı mezbûreyi ma‘rifet-i şer‘iyye ile ârifân olan mezbûrân Mehmed ve Ahmed şehâdetleriyle hasm-ı câhid-i şer‘î mahzarında şer‘an sâbit ve mahkûmun-bih olan İsmail Çelebi b. Mehmed meclis-i şer‘-i şerîf-i enverde, mahmiye-i İstanbul’da Harâccı Muhyiddin mahallesi sâkinlerinden iken bundan akdem vefât eden Pabucubüyük Ömer Efendi b. el-Hâc Mehmed b. Abdullah’ın vasiyy-i muhtârı olmağla terekesine vâzı‘u’l-yed olan İmâm Ali Efendi b. Musa mahzarında her biri asâleten ve vekâleten üzerine da‘vâ ve takrîr-i kelâm edip, biz müteveffâ-yı mezbûr Ömer Efendi’nin li ebeveyn karındaşı mezbûr Ebûbekir’in sulbî oğulları olup mezbûrân Ömer Efendi ve Ebûbekir’in babaları ismi mezbûr el-Hâc Mehmed ve cedleri merkūm Abdullah ve anaları ismi Fâtıma ve maskat-ı re’sleri mahalle-i mezbûre olup ve müvekkile-i mezbûre Râziye Hâtun dahi müteveffâ-yı mezbûr Ömer Efendi’nin li ebeveyn kız karındaşı olup babası mezbûr el-Hâc Mehmed ve anaları merkūme Fâtıma ve maskat-ı re’sleri kezâlik mahalle-i mezbûre olup, müteveffâ-yı mezbûrun verâseti yine müvekkile-i mezbûre Râziye Hâtun’a ve zevcesi Âlime bt. Sefer’e münhasıra ve tashîh-i mes’elesi sekiz sehimden olup sihâm-ı mezbûrenin dört sehimi müvekkile-i mezbûre Râziye’nin ve iki sehimi mezbûre Âlime’ye ve birer sehimi (…) isâbet ve intikāl etmeğin, hâlâ vasiyy-i mezbûr ber vech-i muharrer müteveffâ-yı mezbûrun terekesinden hisse-i irsiyemizi teslîmden imtinâ‘ eder, suâl olunsun dediklerinde gıbbe’s-suâl vasiyy-i mezbûr cevâbında, tereke-i müteveffâ-yı mezbûra ber vech-i meşrûh vaz‘-ı yedini ikrâr, lâkin mezbûrân Mehmed ve Ahmed’in ve müvekkile-i mezbûre Râziye Hâtun’un vech-i muharrer üzre vârisleri olduğunu inkâr edicek, mezbûrân Ahmed ve Mehmed ile vekîl-i mezbûrdan müdde‘âlarına beyyine taleb olundukda, udûl-i müslimînden ve kasaba-i mezbûre sâkinlerinden Musa b. Mehmed ve mahmiye-i mezbûrede zikr olunan Harâccı Muhyiddin mahallesinde sâkin Mehmed Çelebi b. Hamza nâm kimesneler li ecli’ş-şehâde meclis-i şer‘a hâzırân olup isre’l-istişhâd, fi’l-vâki‘ mezbûrân Mehmed ve Ahmed müteveffâ-yı mezbûr Pabucubüyük Ömer Efendi b. el-Hâc Mehmed b. Abdullah’ın li ebeveyn karındaşı Ebûbekir’in sulbî oğulları olup mezbûr Ömer Efendi ile merkūm Ebûbekir’in babaları merkūm el-Hâc Mehmed ve cedleri merkūm Abdullah ve anaları mezbûre Fâtıma’dır ve müvekkile-i mezbûre Râziye Hâtun dahi müteveffâ-yı mezbûr Ömer Efendi’nin li ebeveyn kız karındaşı olup, babaları mezbûr el-Hâc Mehmed’dir ve anaları mezbûre Fâtıma ve maskat-ı re’sleri kezâlik mahalle-i mezbûredir, müteveffâ-yı mezbûrun verâseti mezbûrân Mehmed ve Ahmed ve müvekkile-i mezbûre Râziye Hâtun’a ve zevcesi mezbûre Âlime Hâtun’a münhasıradır, bunlardan mâ‘adâ vârisi ve terekesine müstahıkk-ı âhar olduğu ma‘lûmumuz değildir. Biz bu husûsa bu vech üzre şâhidleriz, şehâdet dahi ederiz deyu her biri edâ-i şehâdet-i şer‘iyye ettiklerinde, gıbbe ri‘âyeti şerâiti’l-kabûl şehâdetleri makbûle olmağın, mûcibiyle müteveffâ-yı mezbûrun terekesinden mezbûrân Mehmed ve Ahmed ve müvekkile-i mezbûre Râziye’ye isâbet eden hisse-i irsiyelerin teslîme vasiyy-i mezbûr Ali Efendi’ye tenbîh olunup, mâ hüve’l-vâki‘ [bi’t-taleb] ketb olundu. Fi’l-yevmi’s-sânî min Recebi’l-ferd li sene isneteyn ve mi’e ve elf. Şuhûdü’l-hâl: El-Hâc İbrahim b. Abdullah, Ali b. Mustafa, Mustafa Efendi [b.] Ramazan, Murad Çelebi, Müezzin Halil Efendi, Yahya Çelebi b. ( ), el-Hâc Mehmed b. Hasan, İbrahim Çelebi b Ahmed, İsmail Çelebi b. Halil.