Bab Mahkemesi 54 Numaralı Sicil (H. 1102 / M. 1691) cilt: 20, sayfa: 410 Hüküm no: 505 Orijinal metin no: [88b-1] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Seyyid Halil Ağa b. İbrahim’in odalarını satması Mahmiye-i İstanbul’da Hoca Üveys mahallesinde sâkin es-Seyyid Halil Ağa b. İbrahim meclis-i şer‘-i şerîf-i enverde, kendi tarafından asîl ve zevcesi Muazzez bt. Abdullah nâm hâtun tarafından husûs-ı âti’l-beyâna vekîl olduğu zâtını ma‘rifet-i şer‘iyye ile ârifân Müezzin es-Seyyid Mehmed Efendi b. es-Seyyid Ömer ve diğer Seyyid Halil b. İbrahim şehâdetleriyle şer‘an sâbit olan işbu bâ‘isü’l-kitâb Çorbacı Mahmud Ağa b. Mustafa mahzarında ikrâr-ı tâm ve takrîr-i kelâm edip, yedimde mülküm olup mahalle-i mezbûrede vâki‘ bir tarafdan Medîne-i Münevvere’de vâki‘ ve bir tarafdan ba‘zan Derzizâde Mehmed Çelebi ba‘zan Odabaşı el-Hâc Abdullah menzilleri ve bir tarafdan ba‘zan Hasan Ağa ve ba‘zan Kol Kethüdâsı Süleyman Paşa Vakfı ve bir tarafdan ba‘zan Mahmud Çavuş ve tarîk-i hâs ve ba‘zan el-Hâc Mehmed Çelebi mülkü ile mahdûd birer oda ve bir sofa ve birer kenîf ve her birinin havluları müştemil üç bâb tahtânî odaları ve hudûd-ı mezkûre dâhilinde zikr olunan odalar mukābelesinde vâki‘ kezâlik birer oda ve birer sofa ve birer kenîf ve birer bi’r-i mâ ve herbirinin havluları müştemil bir oda fevkinde mebnî bir köşk ve eşcâr-ı müsmire ve gayr-ı müsmireyi hâvî hadîka-i kebîre ve kenârında vâki‘ bi’r-i mâ ve karşı be karşı tarîk-i hâssı müştemil başka başka kapılı mecmû‘ arsasının merhûm Hoca Üveys Vakfı’na senede elli beş akçe mukāta‘a-i kadîmesi olan min haysü’l-mecmû‘ beş bâb müte’ehhilîn mülk odalarımı, bi cümleti’t-tevâbi‘ ve’l-levâhık ve kâffeti’l-hukūk ve’l-merâfık bey‘-i bâtt-ı kat‘î ile mezbûrân Mahmud Ağa ve zevcesi Muazzer Hâtun’a yedi yüz guruşa bey‘ ve temlîk ve teslîm ve arsasını izn-i mütevellîyle meccânen ferâğ ve tefvîz, onlar dahi sülüsü mezbûr Mahmud Ağa’nın ve sülüsânı mezbûre Muazzez Hâtun’un olmak üzre iştirâ ve kabûl ve tesellüm ve tefevvüz ettiklerinden sonra semen-i merkūmun sülüsünü merkūm Mahmud Ağa’dan ve sülüsânını mezbûre Muazzez Hâtun’dan cem‘an yedi yüz guruşa yedlerinden tamâmen ahz u kabz ve istîfâ eyledim. Ba‘de’l-yevm mârru’z-zikr beş bâb odalar ve bahçe ve cümle müştemilâtı eslâsen mezbûr Mahmud Ağa ve Muazzez Hâtun’un mülk-i müşterâları ve arsası hakk-ı müfevvazları olmuşdur, benim [hiç bir] vechile alâka ve medhalim kalmamışdır, mezbûrân Mahmud Ağa ve Muazzez Hâtun keyfe mâ yeşâ ve yahtârân mutasarrıf olsunlar dedikde, gıbbe’t-tasdîki’l-vicâhî mâ hüve’l-vâki‘ bi’t-taleb ve’l-ibtiğā ketb ü imlâ olundu. Fi’l-yevmi’s-sânî min Recebi’l-ferd sene 1102. Şuhûdü’l-hâl: Mustafa Efendi b. Veliyyüddin el-imâm, Abdülbâki Efendi İmâm [b.] el-Hâc İlyas, Mehmed Çelebi b. Ahmed, Mehmed Bey b. Ahmed, Süleyman Çelebi b. Mehmed, Mustafa Çelebi b. Murad, Mustafa Çelebi b. Süleyman.