Bab Mahkemesi 54 Numaralı Sicil (H. 1102 / M. 1691) cilt: 20, sayfa: 411 Hüküm no: 506 Orijinal metin no: [88b-2] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Fâtıma bt. Yusuf’un boşandığı kocası Ahmed b. Şaban’dan mehir ve nafakasını alıp zimmetini ibra etmesi Mahmiye-i İstanbul’da Baklalı mahallesi sâkinelerinden olup zâtını ma‘rifet-i şer‘iyye ile ârifân olan Ahmed b. Ahmed ve Mahmud b. Hasan ta‘rîfleriyle mu‘arrefe olan Fâtıma bt. Yusuf nâm hâtun meclis-i şer‘-i şerîf-i enver ve mahfil-i dîn-i münîf-i ezherde, zevc-i mutallıkı bâ‘isü hâze’l-kitâb Ahmed Efendi b. Şaban mahzarında ikrâr ve takrîr-i kelâm edip, zevcim mezbûr Ahmed Efendi târih-i kitâbdan bir ay mukaddem beni tatlîk etmekle, zimmetinde mütekarrir ve ma‘kūdun-aleyh olan iki bin beş yüz akçe-i mehr-i müeccelim ve nafaka-i iddet ve me’ûnet-i süknâm için bi’t-terâzî ta‘yîn olunan üç yüz akçe ki, cem‘an iki bin sekiz yüz akçeyi zevcim mezbûr Ahmed Efendi hâlâ bana def‘ ü teslîm ben dahi yedinden bi’t-tamâm ve’l-kemâl ahz u kabz edip, ba‘de’l-yevm hukūk-ı zevciyyete müte‘allik âmme-i da‘vâdan zevcim mezbûr Ahmed Efendi’nin zimmetini ibrâ-i âmm-ı kātı‘ü’n-nizâ‘la ibrâ ve iskāt eyledim dedikde, gıbbe’t-tasdîki’ş-şer‘î mâ hüve’l-vâki‘ bi’t-taleb ketb olundu. Fi’l-yevmi’s-sâlis min Recebi’l-ferd li seneti 1102. Şuhûdü’l-hâl: İbrahim Efendi el-imâm, Mehmed Efendi el-müezzin, el-Hâc Halil b. ( ), Mehmed Çelebi b. ( ), Hasan Çelebi b. Abdullah, İbrahim Çelebi b. Ahmed, Abdullah Efendi b. el-Hâc Veli, Ali Beşe b. ( ).