Bab Mahkemesi 54 Numaralı Sicil (H. 1102 / M. 1691) cilt: 20, sayfa: 416 Hüküm no: 510 Orijinal metin no: [90a-2] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Fâtıma bt. Mustafa’nın kocasından intikal eden kitaplar hususunda Abdülbâki b. İbrahim’in zimmetini ibra etmesi Husûs-ı âti’l-beyânın mahallinde tahrîri iltimâs olunmağın, savb-ı şer‘-i münîrden irsâl olunan es-Seyyid Abdülmu‘tî Efendi merhûm ve mağfûrun-leh Sultan Selim Hân hazretlerinin câmi‘-i şerîfi imâmı olan fahrü’l-e’immeti’l-kirâm Abdülbâki b. İbrahim Efendi’nin mahmiye-i mezbûrede Çerağcı Hamza mahallesinde vâki‘ menziline varıp, zeyl-i kitâbda muharrerü’l-esâmi udûl-i müslimîn ve sikāt-ı muvahhidîn huzûrunda akd-i meclis-i şer‘-i münîr eyledikde, Sabanca Kasabası’nda sâkine iken bundan akdem vefât eden İmâm İbrahim Efendi b. Mustafa’nın zevce-i metrûkesi ve evlâd-ı sıgārının kıbel-i şer‘den mansûbe vasîleri olan Fâtıma bt. Mustafa nâm hâtun ba‘de’t-ta‘rîfi’ş-şer‘î meclis-i ma‘kūd-ı mezkûrda, işbu râfi‘ü’l-kitâb merkūm Abdülbâki Efendi mahzarında ikrâr-ı tâm ve takrîr-i kelâm edip, târih-i kitâbdan yedi sene mukaddem zevcim mezbûr İbrahim Efendi’nin vefâtından sonra muhallefâtından olan zikri âtî kitâbların bir mikdârını sandık ile oğlum işbu hâzır bi’l-meclis Molla Abdullah yediyle ve bir mikdârını garar ile Karakaş Mehmed Çelebi yediyle âhara bey‘ edivermeleri için merkūm Abdülbâki Efendi’ye irsâl ve teslîm, ol dahi ba‘de’l-kabz içinden bir kıt‘a Şerh-i Buharî ve iki kıt‘a Müslim ve bir cild Seyyid Alizâde ve nısf Hulâsa ve Müştemilü’l-ahkâm ve Metn-i Fenâr ve Metn-i Buharî ve Hızâne ve Mutavvel-i Seydî ve Secâvendî ve Kasîde ve Şerh-i Pend-i Attâr ve Kul Ahmed ma‘a Fenârî nâm on dört kitâbı müteferrikan iki bin dokuz yüz elli yedi akçeye bey‘ ve kabz-ı semen edip ve bir Mutavvel ve Tavzîh ma‘a Hâşiye-i Tecrîd ve Sadrü’ş-şerî‘a ve Risâle-i Tefsîr ve Yakub Paşa ve Seyyid ve Şerh-i Meşârık ve bir def‘a otuz iki cild Minberiyât ve bir def‘a üç cild kitâb ve bir Kara Kemal oğlum mezbûr Abdullah yediyle bezzâzistânda ve sahhâflara iki bin seksen akçe semen-i makbûza bey‘ olunup, min haysü’l-mecmû‘ bey‘ olunan kitâblar bahâlarından beş bin otuz yedi akçe hâsıl olmağla, hâlâ ben meblağ-ı mezbûr beş bin otuz yedi akçeyi tamâmen ahz u kabz ettiğimden sonra kütüb-i bâkıye dahi mecmû‘u bin iki yüz yetmiş beş akçe kıymetli Sadrü’ş-şerî‘a ve Muhtasar ve Molla Câmi ve Eczâ’-i Câmi ve Dav‘-ı üç Mu’rib-i Kâfiyesi ve Ferâiz ve Lügat ve Cezeriye ve Şâfiye ve Tevâbi‘-i Sarf ve Enmûzec-i Sarf ve Merâh-ı Şerh-i Hasan Paşa ve Abdurrahim Şerh-i Merâh ve Avâmil ve Şerh-i Avâmil ve Kâfiye ve Muhtasar Fıkıh ve Erdebilî ve Akāyid nâm yirmi üç [90b] kitâbı benimle oğlum mezbûr Molla Abdullah’a teslîm, ol dahi kendi için alıkoyup bâkī kalan işbu bir cild Bezzâziye ve Mecmû‘a-i Fenârî ve Dürer ve Lübb-i Lübâb ve Dav‘-ı ferâ’iz ve Şerh-i Adud ve Cevâhir ve Mültekā ve Sürûriyye ve Küçük Hâşiye ve Kutbeddin ve Şerh-i Cezeriye ve Şerh-i Akāyid ve Şehâbeddin ve Kasîde-i Bürde ve Secâvendî ve Tıbb-ı Türkî ve Tercüme-i Mesnevî ve Hayalî ve Bahru’l-kelâm nâm yirmi bir cild kitâbı ve işbu eczâ’-i müteferrika ve evrâk-ı perişânî bana redd ü teslîm, ben dahi kabz ve tesellüm eyledim. Min ba‘d ber vech-i muharrer bey‘ olunan kütüb bahâsından ve bey‘ olunmayıp bize teslîm olunan kütüb-i bâkıyeden merkūm Abdülbâki Efendi kıbelinden bir akçe ve bir nesne bâkī kalmayıp ve husûs-ı mezbûra müte‘allika da‘vâ ve nizâ‘ım kalmamışdır dedikde, gıbbe’t-tasdîki’l-vicâhî vâki‘ hâli mevlânâ-yı merkūm mahallinde tahrîr, ba‘dehû ma‘an irsâl Mustafa Beşe b. Mahmud ve Receb b. Süleyman ile meclis-i şer‘a gelip her biri alâ vukū‘ihî inhâ ve takrîr etmeğin, mâ-vaka‘a bi’t-taleb ketb olundu. Fi’l-yevmi’s-sâdis ve’l-ışrîn min Cumâdelâhire li seneti 1102. Şuhûdü’l-hâl: Fahrü’l-müderrisîni’l-kirâm Murtaza Efendi b. Hızır, Mehmed Efendi b. Mehmed imâm-ı mahalle-i mezbûre, Abdülkādir Efendi b. ( ) el-müezzin, Mehmed Efendi b. Musa, Mehmed Efendi b. Mustafa, Latif Efendi b. Mehmed.