Bab Mahkemesi 54 Numaralı Sicil (H. 1102 / M. 1691) cilt: 20, sayfa: 419 Hüküm no: 512 Orijinal metin no: [90b-2] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Sâlih Çelebi b. Bayram’ın menzil ve bahçesini Yeniçeriler 89. Cemâati Odası Vakfı’na bey‘ bi’l-istiğlâl yoluyla satması Medîne-i Üsküdar’da Torbalı mahallesi sâkinlerinden Sâlih Çelebi b. Bayram nâm kimesne meclis-i şer‘-i şerîf-i enverde, Dergâh-ı âlî yeniçerilerinin seksen dokuz cemâati odası neferâtının ta‘âmiyyesi mühimmâtı için mevkūfe nukūdun bi’l-fi‘il mütevellî olan bâ‘isü’l-kitâb Gazanfer Beşe b. Zülfikar mahzarında ikrâr-ı tâm ve takrîr-i kelâm edip, mahalle-i merkūmede vâki‘ bir tarafdan zevcem Ayşe bt. Yusuf mülkü ve bir tarafdan el-Hâc Ahmed mülkü ve iki tarafdan tarîk-i âmla mahdûd büyût-ı adîdeyi müştemil mülk menzilim ile medîne-i merkūme hâricinde merkūm Abdullah Ağa toprağında vâki‘ iki tarafdan tarîk-i âm ve bir tarafdan tarîk-i hâs ve bir tarafdan ba‘zan Kassâm efendi veresesi ve ba‘zan Sadık Dede ve ba‘zan Kirişci Abdülmuttalib kölesi Siyavuş ve ba‘zan Terzi Solak Mehmed Çelebi nâm kimesneler bağları ile mahdûd bir kıt‘a mülk bahçemi bi safkatin vâhidetin bin yüz iki Muharremü’l-harâmı gurresinden mütevellî-i mezbûr Gazanfer Beşe’ye bi tarîki’l-istiğlâl altı yüz guruşa bey‘ ve teslîm, ol dahi mâl-ı vakf-ı mezbûr ile ber vech-i muharrer iştirâ ve tesellüm ve kabûl eyleyip semeni olan meblağ-ı mezbûr altı yüz guruşu mütevellî-i mezbûr yedinden tamâmen ahz u kabz eylediğimden sonra mütevellî-i mezbûr Gazanfer Beşe sâlifü’z-zikr menzil ile bağı mahallinde ba‘de’t-tahliyeti’ş-şer‘iyye ve’t-tekābuzi’l-mer‘î beher senesi altmış guruşa olmak üzre târih-i mezkûrdan iki sene tamâmına değin yüz yirmi guruşa bana îcâr ve teslîm, ben dahi ber vech-i meşrûh istîcâr ve tesellüm ve kabûl eyledim dedikde, gıbbe’t-tasdîki’l-mu‘teberi’l-vicâhî mâ hüve’l-vâki‘ bi’t-taleb ketb olundu. Fi’l-yevmi’s-sânî min Recebi’l-ferd li seneti 1102. Şuhûdü’l-hâl: Mustafa Efendi b. Ahmed, Vefalı Mustafa Odabaşı, Mehmed Efendi b. Abbas, Abdullah Efendi el-imâm, Mehmed Çelebi b. Mustafa, İsmail [b.] el-Hâc Mehmed.