|
Bab Mahkemesi 54 Numaralı Sicil (H. 1102 / M. 1691) cilt: 20, sayfa: 419 Hüküm no: 513 Orijinal metin no: [91a-1] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır.
Feyzullah Beşe b. Hacı Mehmed’in terekesinin kardeşi Süleyman Çelebi’ye teslim olunması
Mahmiye-i İstanbul’da Koca Mustafa Paşa kurbunda Çerağî Hasan Beşe mahallesi sükkânından ve Dergâh-ı âlî yeniçerilerinin altmışıncı cemâ‘atine mahsûs oda ahâlîsinden olup, medîne-i merkūmede fevt olan Feyzullah Beşe b. el-Hâc Mehmed b. el-Hâc Osman’ın verâseti, li ebeveyn karındaşı Süleyman Çelebi’ye münhasıra olduğu şer‘an zâhir ve müte‘ayyin oldukdan sonra mezbûr Süleyman Çelebi meclis-i şer‘-i şerîf-i enverde bundan akdem Dergâh-ı âlî yeniçerileri ağası olan sa‘âdetlü Mahmud Paşa’nın beytülmâl nâzırı olan el-Hâc Ali Ağa b. Mustafa tarafından husûs-ı âti’z-zikri tasdîka vekîl olduğu Musa Beşe b. Mehmed ve el-Hâc Hüseyin b. Abdullah şehâdetleriyle şer‘an sâbit olan Ahmed Beşe b. Hasan mahzarında ikrâr ve takrîr-i kelâm edip, müvekkil-i mezbûr el-Hâc Ali Ağa karındaşım müteveffâ-yı mezbûrun zâhirde vâris-i ma‘rûfu olmamak zu‘muyla yanında mevcûd terekesinden dokuz bin akçesini bi’l-emâne ahz u kabz etmişdi. Hâlâ meblağ-ı mezbûr dokuz bin akçeyi bana def‘ ü teslîm, ben dahi tamâmen ahz u kabz ve tesellüm eyledim. Fîmâ-ba‘d tereke-i müteveffâ-yı mezbûra müte‘allika âmme-i da‘vâdan müvekkil-i mezbûr el-Hâc Ali Ağa’yı ibrâ-i âmm-ı kātı‘ü’n-nizâ‘la ibrâ ve iskāt eyledim dedikde, gıbbe’t-tasdîki’ş-şer‘î mâ hüve’l-vâki‘ bi’t-taleb ketb olundu. Fi’l-yevmi’l-ışrîn min Cumâdelâhire li sene isneteyn ve mi’e ve elf.
Şuhûdü’l-hâl: Mehmed Kethüdâ b. Mustafa, Samsunî el-Hâc İbrahim Yazıcı, Mehmed Çelebi b. Abdullah, İbrahim Çelebi b. Ahmed, Musa Beşe b. Mehmed, el-Hâc Hüseyin b. ( ), İbrahim Çelebi b. Mehmed.
|