|
Bab Mahkemesi 54 Numaralı Sicil (H. 1102 / M. 1691) cilt: 20, sayfa: 420 Hüküm no: 514 Orijinal metin no: [91a-2] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır.
Uskünye bt. Yanaki’nin menzilini Todori v. Yorgi’ye satması
Dârü’l-hilâfeti’l-aliyye Kostantıniyye el-mahmiye’de Edirnekapısı dâhilinde sâkine olup zâtı Mehmed Efendi b. Musli ve Mehmed b. Mustafa nâm kimesneler ta‘rîfleriyle mu‘arrefe olan Uskünye bt. Yanaki nâm hâtun meclis-i şer‘-i şerîf-i enverde, bâ‘isü hâze’s-sifr Todori v. Yorgi nâm zimmî mahzarında ikrâr ve takrîr-i kelâm edip, silk-i mülkümde münselik olup mahmiye-i mezbûrede Ali Paşa-yı Atîk mahallesiyle el-Hâc Muhyiddin mahallesi mâbeyninde vâki‘ bir tarafdan Rizo nâm zimmî mülkü ve bir tarafdan kilise ve iki tarafdan tarîk-i âm ile mahdûd büyût-ı adîdeyi müştemil mülk menzilimi, mezbûr Todori’ye tarafeynden îcâb ve kabûlü hâvî bey‘-i kat‘î ile yedi yüz elli guruşa bey‘ ve teslîm, ol dahi ber vech-i muharrer iştirâ ve tesellüm eylediğinden sonra semeni olan meblağ-ı mezbûr yedi yüz elli guruşu mukaddemâ kendiye deynim olan üç yüz elli guruşa meblağ-ı mezbûrun ol mikdârını takās, ol dahi mukāssa ve kabûl edip bâkī dört yüz guruşunu dahi nakdinden bi’t-tamâm ahz u kabz eyledim. Ba‘de’l-yevm menzil-i mahdûd-ı mezkûr merkūm Todori’nin mülk-i müşterâsıdır, keyfe mâ yeşâ ve yahtâr mutasarrıf olsun dedikde, gıbbe’t-tasdîki’ş-şer‘î mâ-vaka‘a bi’t-taleb ketb olundu. Fi’l-yevmi’s-sânî min Recebi’l-mürecceb li seneti isneteyn ve mi’e ve elf.
Şuhûdü’l-hâl: Ahmed Efendi el-imâm, Halil Çelebi b. Ali, Ahmed b. Mustafa, Mehmed b. Musli, Berber Ahmed Çelebi, İsmail b. Muharrem, Papa Dimitri v. Sanaki, Dimitri v. Tanaş, Nikola v. ( ), İsterani v. Dimitri, Dimitri v. Nikola, Yani v. Miho ve gayruhüm.
|