.:: İstanbul Kadı Sicilleri ::.


Bab Mahkemesi 54 Numaralı Sicil (H. 1102 / M. 1691)
cilt: 20, sayfa: 421
Hüküm no: 515
Orijinal metin no: [91a-3]
Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır.


Hüseyin Ağa b. Abdullah’ın menzil hissesini ortağı Ali b. Osman’a satması

Mahmiye-i İstanbul’da Defterdâr Ahmed Çelebi mahallesi sâkinlerinden Hüseyin Ağa b. Abdullah nâm kimesne meclis-i şer‘-i şerîf-i enver ve mahfil-i dîn-i münîf-i ezherde, bâ‘isü hâze’l-kitâb Ali b. Osman nâm kimesne mahzarında ikrâr ve takrîr-i kelâm edip, akd-i âti’z-zikrin sudûruna değin gāib ani’l-meclis Hasan Ağa b. Sâlih nâm kimesne ile ale’l-iştirâki’s-seviy yedimizde mülk ve hakkımız olup, mahmiye-i mezbûrede Kâtib Kasım mahallesinde vâki‘ bir tarafdan Ali Beşe nâm kimesne tasarrufunda olan vakıf menzil ve bir tarafdan Kapıcı Mehmed Bey mülkü ve bir tarafdan Ayşe Hâtun mülkü ve bir tarafdan tarîk-i âm ile mahdûd fevkānî bir bâb oda ve bir sofa ve dehliz ve tahtânî bir bâb oda ve bir mahtab ve bir kenîfi müştemil mülk menzilde olan nısf hisse-i şâyi‘amı, cümle tevâbi‘ ve levâhıkı ve kâffe-i hukūk ve merâfıkı ile mezbûr Ali’ye tarafeynden îcâb ve kabûlü hâvî şürût-ı müfsideden ârî bey‘-i bâtt-ı sahîh-i şer‘î ile yüz elli guruşa bey‘ ve teslîm, ol dahi ber vech-i muharrer iştirâ ve tesellüm ve kabz ettiğinden sonra semeni olan meblağ-ı mezbûr yüz elli guruş mezbûr Ali yedinden tamâmen ahz u kabz eyledim. Ba‘de’l-yevm menzil-i mezkûrun nısf-ı şâyi‘i mezbûr Ali’nin mülk-i müşterâsı olmuşdur, keyfe mâ yeşâ ve yahtâr mutasarrıf olsun dedikde, gıbbe’t-tasdîki’ş-şer‘î mâ-vaka‘a bi’t-taleb ketb olundu. Fî gurreti Recebi’l-ferd li sene isneteyn ve mi’e ve elf.


Şuhûdü’l-hâl: El-Hâc Hasan b. Abdullah, el-Hâc Hüseyin Kazganî, el-Hâc Ahmed Kazganî, (...)