.:: İstanbul Kadı Sicilleri ::.


Bab Mahkemesi 54 Numaralı Sicil (H. 1102 / M. 1691)
cilt: 20, sayfa: 421
Hüküm no: 516
Orijinal metin no: [91b-1]
Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır.


Hüseyin b. Ahmed’in menzilini vakıf mütevellisi Ümmühâni Hatun bt. Abdullah’a bey‘ bi’l-istiğlâl yoluyla satması

Mahmiye-i İstanbul’da Muhtesib İskender mahallesi sâkinlerinden Hüseyin b. Ahmed nâm kimesne meclis-i şer‘-i şerîfde, yine mahmiye-i mezbûrede Demirkapı kurbunda vâki‘ fahrü’l-muhadderât Ümmühâni Hâtun bt. Abdullah tarafından husûs-ı âti’l-beyâna vekîl olup, vekâleti mezbûreyi ma‘rifet-i şer‘iyye ile ârifân olan Osman Efendi b. Ahmed b. İbrahim b. Hasan nâm kimesneler şehâdetleriyle şer‘an nâ’ib olan işbu râfi‘ü’l-kitâb Ali Ağa b. Şeyhî mahzarında ikrâr ve takrîr-i kelâm edip, akd-i âti’z-zikrin sudûruna değin yedimde mülküm ve hakkım olup, zikr olunan Muhtesib İskender mahallesinde vâki‘ bir tarafdan İbrahim Çelebi mülkü ve bir tarafdan Siyavuş b. Abdullah mülkü ve bir tarafdan Medîne-i Münevvere vakfı olup Osman Beşe tasarrufunda olan menzil ve bir tarafdan tarîk-i âm ile mahdûd büyût-ı adîdeyi müştemil menzilimi, cümle tevâbi‘ ve levâhıkı ile bi tarîki’l-istiğlâl, tarafeynden îcâb ve kabûlü hâvî ve şürût-ı müfsideden ârî mütevellîye-i mezbûre Ümmühâni Hâtun mâl-ı vakf-ı mezbûr ile elli esedî guruşa bey‘ ü teslîm, ol dahi vech-i meşrûh üzre iştirâ ve tesellüm edip, semeni olan meblağ-ı mezbûr elli esedî guruşa mütevellîye-i mezbûre Ümmühâni yedinden mâl-ı vakf-ı mezbûrdan olmak üzre tamâmen ahz u kabz edip, menzil-i mezbûr içinde olan eşyâ-yı ma‘lûmemi mütevellîye-i mezbûra îdâ‘, ol dahi istîdâ‘ etmeğin, menzil-i mezbûru ve eşyâ-yı mezkûreyi kabza izin verilmeğin, ol dahi kabz ettiğimden sonra mütevellîye-i mezbûre Ümmühâni Hâtun menzil-i mahdûd-ı mezkûru gıbbe’t-tahliyeti’ş-şer‘iyye ve’t-tekābuzi’l-mer‘î târih-i kitâbdan üç sene tamâmına değin beher senesi yedişer buçuk guruşdan yirmi iki buçuk guruş ücret ile bana îcâr ve teslîm ve ben dahi vâzı‘ında olan eşyâ-i ma‘lûme yine bana red eyledikde, vech-i muharrer üzre istîcâr ve kabûl ve tesellüm eyledim dedikde, gıbbe’t-tasdîki’ş-şer‘î mezbûr Hasan’ın zevcesi işbu hâzıra bi’l-meclis Safiye bt. Abdullah nâm hâtun derk-i menzil-i mezkûra kefîl oldum dedikde, mâ hüve’l-vâki‘ bi’t-taleb ketb olundu. Fî gurreti Recebi’l-mürecceb sene 1102.


Şuhûdü’l-hâl: El-Hâc Mehmed b. Osman, es-Seyyid Mustafa Çelebi b. ( ), el-Hâc Yusuf Beşe b. ( ), Mehmed Çavuş el-mübâşir, Osman Efendi b. Ahmed, İbrahim b. Hasan.