|
Bab Mahkemesi 54 Numaralı Sicil (H. 1102 / M. 1691) cilt: 20, sayfa: 422 Hüküm no: 517 Orijinal metin no: [91b-2] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır.
Terzi Mehmed b. Ahmed’in Ali Çelebi b. Hasan’ın sof bedelini ödemesi
Mahmiye-i İstanbul’da Hoca Hayreddin mahallesinde sâkin Ali Çelebi b. Hasan nâm kimesne meclis-i şer‘-i şerîf-i enverde, Terzi Mehmed b. Ahmed mahzarında üzerine da‘vâ ve takrîr-i kelâm edip, mezbûr Terzi Mehmed’e yirmi guruş kıymetli bir cevzî sofumu dikmek için def‘ ve teslîm, ol dahi ahz u kabz ettiğinden sonra, gece ile eşyâ ve sâiresini kendi menziline getirip, ancak zikr olunan [sofu]? dükkân-ı mezbûrda bırakmakla, târih-i kitâb gecesi dükkânı açılıp zikr olunan sof serîka olunmuşdur. Hâlâ suâl olunup, ber vech-i muharrer te‘addîsine binâ’en mârru’z-zikr sofun kıymet-i şer‘iyyesini bi tarîk bana teslîme mezbûra tenbîh olunmak matlûbumdur dedikde, gıbbe’s-suâl merkūm Terzi Mehmed cevâbında, fi’l-hakīka bâlâda tafsîl ve beyân olunan vech üzre olup, müdde‘î-i mezbûrdan zikr olunan sofu ahz u kabz, gece ile eşyâ-i sâiresini menziline getirip, ancak mârru’z-zikr sofu dükkân-ı mezbûrda bırakıp serîka olunmuşdur deyu te‘addîsini ikrâr ve i‘tirâf ettikden sonra mârru’z-zikr sofun kıymet-i şer‘iyyesi olan meblağ-ı merkūm yirmi guruşa bi tarîki’d-damân merkūm Ali Çelebi’ye edâya merkūm Terzi Mehmed bi tav‘ıhî müte‘ahhid olmağın, mâ-vaka‘a bi’t-taleb ketb olundu. Fi’l-yevmi’l-hâdî min Recebi’l-ferd sene 1102.
Şuhûdü’l-hâl: İbrahim Çelebi b. Ahmed, Seyyid Mehmed Efendi b. ( ), İsmail Çelebi b. Mehmed, Mustafa Çelebi b. ( ), Mahmud b. Hasan, Mehmed b. İdris.
|