Rumeli Sadâreti Mahkemesi 272 Numaralı Sicil (H. 1171-1172/ M. 1758) cilt: 74, sayfa: 377 Hüküm no: 471 Orijinal metin no: [95b-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Kaybolan ve Mehmed b. Veli’nin elinde bulunan Zenci Musa’nın teslim olunması Ma‘rûz, Uşak kazâsına tâbi‘ Hasköy nâm karye ahâlîsinden Ali b. Ramazan b. Turan? tarafından zikri âtî husûsa vekîl olduğu Hasan Bey b. Mustafa ve Himmet b. Süleyman şehâdetleriyle sâbit olan sâhib-i arzuhâl Mehmed b. Veli mahfil-i şer‘iyyâtda sâbıkā İzmir Voyvodası derûn-ı arzuhâlde mezkûrü’l-ism el-Hâc Mehmed Ağa b. Ahmed muvâcehesinde işbu uzun boylu Zenciyü’l-asl Müslimetü’l-mille mültehî Musa müvekkilim mezbûr Ali’nin abd-i memlûkü olup târîh-i i‘lâmdan altı ay mukaddem yedinden ibâk etmiş idi. Hâlâ mezbûr el-Hâc Mehmed Ağa’nın yedinde bulmamla bi’l-istihkāk bi’l-vekâle taleb ederim deyü da‘vâ etdikde merkūm el-Hâc Mehmed Ağa cevâbında mevsûf-ı mezbûru târîh-i mezkûrda medîne-i mezbûrede voyvoda olmamla yava olmak üzere ahz ve bi’l-emâne vaz‘-ı yed ederim deyü vaz‘-ı yedini ikrâr ve müvekkil-i mezbûrun abd-i memlûkü olup ber-vech-i muharrer yedinden ibâk eylediğini ba‘de’l-inkâr [96a] müdde‘î-i vekîl-i mezbûr ber-vech-i muharrer müdde‘âsını adâletleri zâhire olan Molla Osman b. Mustafa ve Hasan b. Mustafa şehâdetleriyle muvâcehesinde isbât etmeğin mûcebiyle mevkūfen li’l-yemîn ale’l-müvekkil ba‘de’l-hükm mevsûf-ı mezbûru vekîl-i merkūm Molla Mehmed’e redd ü teslîme mezbûr el-Hâc [Mehmed] Ağa’ya tenbîh olunduğu huzûr-ı âlîlerine i‘lâm olundu. El-emru li-men-lehü’l-emr. Fi’l-yevmi’l-ışrîn min-Muharremi’l-harâm li-sene isneteyn ve seb‘în ve mi’ete ve elf.