Rumeli Sadâreti Mahkemesi 272 Numaralı Sicil (H. 1171-1172/ M. 1758) cilt: 74, sayfa: 378 Hüküm no: 473 Orijinal metin no: [96a-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Musa b. Mehmed’in vefat eden Selim b. Mehmed’in varisleri eşi Hanife ve sairleri aleyhindeki alacak davasının reddedilmesi Müteveffâ el-Hâc Selim b. Mehmed’in verâseti zevce-i metrûkesi Hanife Hatun ile sulbî sagīr oğlu Süleyman ve sulbiye sagīre kızı Âişe’ye ba‘de’l-inhisâ[r] sâhib-i arzuhâl Musa b. Mehmed mahfil-i şer‘iyyâtda kendi tarafından asâleten ve sagīretân-ı mezbûrânın bâ-hüccet vasîleri olmağla vesâyeten tereke-i müteveffâ-yı mezbûra vâzı‘atü’l-yed ve zâtı ta‘rîf-i şer‘î ile mu‘arrefe olan zevce-i mezbûre Hanife Hatun muvâcehesinde müteveffâ-yı mezbûr el-Hâc Selim’i hayatında vatan-ı asliyyem olan Göllükesri kazâsında kâin bir kıt‘a çiftliğimi yüz altmış guruşa âhara bey‘a ve tarafımdan vekîl edip ol dahi ba‘de’l-kabûlü’l-vekâle yüz altmış guruşa âhara bey‘ ve kabz-ı semen edip lâkin semen-i mezbûru bana kable’t-teslîm mücehhelen vefât etmekle meblağ-ı mezbûr yüz altmış guruşu ve müteveffâ-yı mezbûre Hanife Hatun cevâbında tereke-i müteveffâ-yı mezbûra bi’l-verâse ve bi’l-vesâye vaz‘-ı yedini ikrâr ve müdde‘î-i mezbûrun ber-vech-i muharrer müdde‘âsını inkârından mâ‘adâ müdde‘î-i mezbûr husûs-ı merkūmu yetmiş bir senesi Zilhiccesi evâsıtında Kocamustafapaşa kurbünde Uzun Yusuf mahallesinde sâkine olduğum menzilimde benden ba‘de’d-da‘vâ ve’l-inkâr müdde‘î-i mezbûr Musa da‘vâ-yı mezkûresinden bâ-vesâtet-i muslihîn benimle yüz guruş bedel-i makbûza sulh olup mâ‘adâsına ve ecr-i misline ve târîh-i mezbûra gelince sâire müte‘allika âmme-i da‘vâ ve kâffe-i mutâlebâtdan zevcim müteveffâ-yı mezbûr ile benim ve sagīrân-ı mezbûrânın zimmetlerini ibrâ ve iskāt dahi etmiş idi deyü ba‘de’d-def‘ ve’l-inkâr dâfi‘a-i mezbûre Hanife ber-vech-i meşrûh def‘ini Silahdâr Ocağı çavuşlarından Hasan Ağa b. Halil ve Mahmud Çelebi b. Hüseyin ve Mehmed Çelebi b. Veli nâm üç nefer kimesneler şehâdetleriyle muvâcehesinde vech-i şer‘î üzere ba‘de’l-isbât ve’t-tezkiye şehâdetleri makbûle olmağın mûcebiyle müdde‘î-i mezbûr Musa husûs-ı mezkûr için mezbûre Hanife’ye bî-vech mu‘ârazadan men‘ olunduğu huzûr-ı âlîlerine i‘lâm olundu. Fî 23 M sene 1172.