Rumeli Sadâreti Mahkemesi 272 Numaralı Sicil (H. 1171-1172/ M. 1758) cilt: 74, sayfa: 379 Hüküm no: 474 Orijinal metin no: [96b-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Çukacı Corci’ye olan borcunu ödemesi hususunda Ümmügülsüm’e tenbihte bulunulması Ma‘rûz, Çukacı tâifesinden arzuhâl eden Corci v. Marti zimmî mahfil-i şer‘iyyâtda Ahıskalı Ahmed Bey’in zevcesi olup zâtı Ali b. Mehmed ve Mustafa b. Osman ta‘rîfleriyle mu‘arrefe olan Ümmügülsüm bt. Hasan Efendi mahzarında mezbûr Ahıskalı Ahmed Bey b. Ebabekir b. Abdullah zimmetinde on yedi gün mukaddem yedimden iştirâ ve kabz eylediği iki yüz altmış beş buçuk zirâ‘ elvân çuka ve on yedi zirâ‘ atlas bahâlarından yedi yüz otuz altı guruş hakkım olup meblağ-ı mezbûrun iki yüz altmış dört guruşunu bundan akdem mezbûre Ümmügülsüm yediyle ahz ve istîfâ etmiş idim. Bâkī kalan dört yüz yetmiş iki guruşu dahi mezbûr Ahmed Bey’den taleb eylediğimde zevcesi mezbûre Ümmügülsüm meblağ-ı bâkī-i mezkûr dört yüz yetmiş iki guruşun edâsına bi’l-emr ve’l-kabûl kefîl ve zâmine olup ben dahi târîh-i i‘lâmdan otuz bir gün tamâmında mezbûre Ümmügülsüm meblağ-ı bâkī-i mezkûru bana edâ etmek üzere te’cîl edip merkūme dahi kabûl ve ecel-i mezkûr hulûlünde bana edâya müte‘ahhide olmağla meblağ-ı bâkī-i mezkûru mezbûre Ümmügülsüm’den ber-vech-i muharrer kefâletine binâen taleb ederim deyü da‘vâ ve mezbûre Ümmügülsüm cevâbında müdde‘î-i mesfûr Corci zimmînin ber-minvâl-i muharrer müdde‘âsını ikrâr ü i‘tirâf etmeğin alâ-mûcibi i‘tirâfihâ meblağ-ı bâkī-i mezkûr dört yüz yetmiş iki guruşu ecel-i mezkûr hulûlünde müdde‘î-i mesfûr Corci’ye bi-hükmi’l-kefâle edâ ve teslîme mezbûre Ümmügülsüm’e tenbîh olunduğu huzûr-ı âlîlerine i‘lâm olundu. Fî 22 Muharrem sene 1172