.:: İstanbul Kadı Sicilleri ::.


Bab Mahkemesi 54 Numaralı Sicil (H. 1102 / M. 1691)
cilt: 20, sayfa: 423
Hüküm no: 518
Orijinal metin no: [91b-3]
Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır.


Hasan Çavuş b. Ali’nin alacak davasının reddi

Mahmiye-i İstanbul’da Yenikapı dâhilinde Çukur mahallesinde sâkin Hasan Çavuş b. Ali tarafından husûs-ı âti’l-beyâna vekîl olduğu mahalle-i mezbûra sükkânından İbrahim b. Mehmed ve Ahmed b. Abdullah nâm kimesneler şehâdetleri ile şer‘an sâbit olan İsmail Çelebi b. Hüseyin meclis-i şer‘-i şerîf-i enverde, bâ‘isü’s-sifr Terzi Yanaki v. Vasil muvâcehesinde bi’l-vekâle üzerine da‘vâ ve takrîr-i kelâm edip, müvekkilim mezbûrdan merkūm Yanaki iştir[â] ve kabz ettiği çuka bahâsından altı guruş hakkı olmağla bi’l-vekâle taleb ederim, suâl olunup alıverilmesi matlûbumdur dedikde, gıbbe’s-suâl ve akībe’l-inkâr, vekîl-i mezbûrdan müdde‘âsına mutâbık beyyine taleb olundukda, ityân-ı beyyineden izhâr-ı acz ve istihlâf etmeğin, fi’l-hakīka müdde‘î-i mezbûr vekîl-i merkūm Hasan Çavuş’a cihet-i merkūmeden altı guruş deyni olmadığına merkūm Yanaki’ye yemîn teklîf olundukda, ol dahi alâ vefki’l-mes’ûl yemîn billâhi’llezî enzele’l-incîle alâ İsâ -aleyhi’s-selâm- etmeğin, mûcibince vekîl-i mezbûr bî-vech mu‘ârazadan men‘ olunup, mâ-vaka‘a bi’t-taleb ketb olundu. Fi’l-yevmi’s-sânî min Recebi’l-ferd li sene isneteyn ve mi’e ve elf.


Şuhûdü’l-hâl: El-Hâc Hasan b. Abdi, İbrahim Çelebi b. Ahmed, Mustafa Çelebi b. Şaban, Ali Çelebi b. Bâki ve gayruhüm.