Rumeli Sadâreti Mahkemesi 272 Numaralı Sicil (H. 1171-1172/ M. 1758) cilt: 74, sayfa: 380 Hüküm no: 475 Orijinal metin no: [96b-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Görele’nin Ortaköy halkından Ahmed’in şikâyetle İstanbul’a getirttiği şahısların serbest bırakılmaları Ma‘rûz, Anadolu’da Görele kazâsına tâbi‘ Ortaköy nâm karye ahâlîsinden derûn-ı arzuhâlde mezkûrü’l-ism el-Hâc Ahmed mahfil-i şer‘iyyâtda Ocak çavuşânından Ebubekir Çavuş mübâşeretiyle Âsitâne-i sa‘âdete bâ-fermân-ı âlî ihzâr olunan sâhib-i arzuhâl Ahmed Bey nâm kimesne ile yine kazâ-i mezkûre tâbi‘ Cengîler nâm karyede Hamamcı Kazer ve Yeniköy nâm karyede Keleşoğlu Ohan ve Ortaköy nâm karyeden Demircioğlu Adam ve Kabril nâm zimmîler muvâcehelerinde mesfûrûn zimmîler târîh-i i‘lâmdan dört sene mukaddem mezbûr Ahmed Bey’in tahrîk ve iğrâsıyla karye-i mezkûrede vâki‘ sâkine olduğum menzilimi basıp oğlum İsmail’e balta ile başına darb ü cerh ve katl ve üç yüz guruşluk ber-mûceb-i defter-i müfredât eşyâmı nehb ü gāret etmişlerdir deyü da‘vâ, onlar dahi inkâr edip beynlerinde ba‘de’l-münâza‘a müdde‘î-i mezbûr el-Hâc Ahmed da‘vâ-yı mezkûresinden meccânen fâriğ olup husûs-ı mezkûre ve bi’l-cümle sâire müte‘allika âmme-i de‘âvîden mezbûr Ahmed Bey ile mesfûrûn Kazer ve Ohan ve Adam ve Kabril’den herbirinin zimmetini ibrâ-i âm ile ibrâ ve iskāt eylediğinde onlar dahi kezâlik cemî‘ hukūka müte‘allika âmme-i de‘âvîden mezbûr Ahmed’in zimmetini ibrâ-i âm ile ibrâ edip ve her biri âharın ibrâsını kabûlle kat‘-ı nizâ‘ etdikleri ve mezbûr Ahmed Bey ile mesfûrûn Kazer ve Ohan ve Adam ve Kabril ihzârları bâbında sâdır olan emr-i âlî kaydı terkīn olundup sebîlleri tahliye olunmak bâbında fermân-ı âlî ricâsında oldukları ma‘lûm buyuruldukda fermân men-lehü’l-emrindir. Fî 23 Muharrem sene 1171.