Rumeli Sadâreti Mahkemesi 272 Numaralı Sicil (H. 1171-1172/ M. 1758) cilt: 74, sayfa: 380 Hüküm no: 476 Orijinal metin no: [96b-3] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Kokoş Mukataası eski voyvodası Mehmed’in borcunu ödememesi nedeniyle kalebend cezasının kaldırılması Bâ-hazret Efendi, Ma‘rûz, Sâdır olan fermân-ı âlîlerine imtisâlen derkenârda mezkûr husûsa mukaddemâ mevlâ ta‘yîn buyurulan İstanbul’da Abdullah Efendi’nin işbu arzına ve derkenâra nazar olundukda Kokoş Mukâta‘asında voyvoda-i sâbıkı es-Seyyid Mehmed husûmu olan mukāta‘a-i mezbûre re‘âyâları ile mahâllinde akdolunan meclis-i şer‘de hukūk-ı şer‘iyye da‘vâlarından bâ-vesâtet-i muslihîn on altı bin beş yüz guruş üzerine ba‘de akdi’l-musâlaha ve’l-mu‘ârefe ve’l-kabûl bedel-i sulhu tamâmen kabz ve kat‘-ı nizâ‘ ve hüccet-i şer‘iyye olunduğu arz-ı mezkûr nâtık ve üç ay muahharan merkūm es-Seyyid Mehmed’in bedel-i sulhu vermede mümâtalesi zâhirdir deyü mevlâ-yı mûmâ-ileyh arzına binâen mezbûr es-Seyyid Mehmed’in İnebahtı kal‘asında kal‘a-bend ve hapsi ve kable’l-edâ ıtlâk olunmamak üzere emr-i şerîf sâdır olduğunu derkenâr müş‘ir [97a] ve mevlânâ-yı mûmâ-ileyh hâlâ Âsitâne-i sa‘âdet’de mevcûd olmağla ihtiyâten meclis-i şer‘a da‘vet ve istintâk olundukda mezbûr es-Seyyid Mehmed zikr olunan Kokoş re‘âyâsı ile ol mikdâr guruşa musâlaha ve mübâreyi ve bedel-i sulh-ı mezkûru tamâmen ve kâmilen mahâllinde meclis-i şer‘de re‘âyâya def‘ ü teslîm, onlar dahi ahz u kabz etmeleriyle (…) Mehmed’in yedine mufassal ve meşrûh hüccet-i şer‘iyye i‘tâ olunmuşdur deyü takrîr ve işbu arz ile hüccet-i mezkûrenin mazmûnlarını te’yîd eylediği ve mezbûr es-Seyyid Mehmed kal‘a-i mezkûreden afv ve ıtlâk buyurulup kal‘a-bend olunması için sâdır olan emr-i âlîşânın kaydı terkīn olunmak bâbında emr-i âlî ricâsında olduğu ma‘lûm-ı devletleri buyuruldukda fermân men-lehü’l-emr hazretlerinindir. Fî 23 min-Muharrem sene 1172.