Rumeli Sadâreti Mahkemesi 272 Numaralı Sicil (H. 1171-1172/ M. 1758) cilt: 74, sayfa: 381 Hüküm no: 477 Orijinal metin no: [97a-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Hatice bt. Mustafa’nın, eşi Hasan aleyhindeki boşanma ve yaralama davasını ispat edemediği Ma‘rûz, Mahmiye-i İstanbul’da Topkapısı kurbünde sâkine ve zâtı ta‘rîf-i şer‘î ile mu‘arrefe olan Hadice bt. Mustafa nâm Kıbtiye mahfil-i şer‘iyyâtda zevc-i dâhili işbu bâ‘is-i i‘lâm Hasan b. el-Hâc Abdurrahman muvâcehesinde zevcim mezbûr Hasan târîh-i i‘lâmdan yirmi gün mukaddem eğer şurb-i hamr edersem ve kumar oynarsam benim için benden mutallaka ol deyü şart ve ta‘lîk edip üç gün mürûrunda zevcim mezbûr Hasan şurb-i hamr eylediğinden mâ‘adâ menzilimin kapısı önünde şiş ile iki butumdan bi-gayr-ı hakkın amden beni darb ve cerh dahi etmekle şart-ı merkūmun vukū‘una binâen ben mutallaka olmamla zimmetinde mütekarrir ve ma‘kūdün-aleyh olan kırk guruş mehr-i müeccelimi ve ber-vech-i muharrer cerh-i mezkûrun mûceb-i şer‘îsini mezbûr Hasan’dan hâlâ taleb ederim deyü ba‘de’d-da‘vâ ve’l-inkâr müdde‘iye-i mezbûre Hadice ber-vech-i muharrer şart-ı mezkûrun vukū‘unu isbâtdan izhâr-ı acz ile istihlâf etmeğin mezbûr Hasan’a vech-i şer‘î üzere muvâcehesinde yemîn verilmeğin mûcebiyle müdde‘iye-i mezbûre Hadice şart-ı mezkûr da‘vâsıyla mezbûr Hasan’a bilâ-beyyine bî-vech mu‘ârazadan ba‘de’l-men‘ mezbûr Hadice ber-vech-i muharrer darb ve cerh da‘vâsını isbâta havâle olunduğu huzûr-ı âlîlerine i‘lâm olundu. Fî 25 Muharrem sene 1172.