Rumeli Sadâreti Mahkemesi 272 Numaralı Sicil (H. 1171-1172/ M. 1758) cilt: 74, sayfa: 382 Hüküm no: 478 Orijinal metin no: [97a-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Ömer Haseki’nin Rukiye Hatun’dan aldığı hastalıklı cariye Zenciye Hacer’i geri Rukiye Hatun’a satması Ma‘rûz, Ömer Haseki b. Mehmed b. Abdullah tarafından zikri âtî husûsda vekîl olduğu karındaşı Ahmed ve Hüseyin b. İbrahim şehâdetleriyle sâbit olan Osman Haseki b. Abdullah mahfil-i şer‘iyyâtda zâtı ta‘rîf-i şer‘î ile mu‘arrefe olan Rukiye Hatun bt. Hüseyin muvâcehesinde mezbûre Rukiye’den yetmiş bir senesi Ramazan-ı şerîfinin sekizinci günü müvekkilim mezbûrun yüz elli guruş semen-i medfû‘a iştirâ ve kabz eylediği işbu hâzıra bi’l-meclis Zenciye Hacer nâm câriye inde’t-tüccâr noksân semen îcâb eder uyûb-ı şer‘iyyeden selîsü’l-bevle mübtelâ olduğundan mâ‘adâ sevdâ-yı merâkı dahi olmağla redd-i mebî‘ ve istirdâd-ı semen ederim deyü da‘vâ eylediğimde beynimizde ba‘de’l-münâza‘a, ber-minvâl-i muharrer nizâ‘ımızdan fâriğ olup câriye-i mezbûre Zenciye Hacer’i ayb-ı mezkûr ile mezbûre Rukiye Hatun’a bi’l-vekâle işbu meclis-i şer‘de müceddeden yüz on beş guruşa bey‘ ü teslîm eylediğimde, ol dahi iştirâ ve tesellüm ve kabz ve kabûl eyledikden sonra semeni olan meblağ-ı mezbûr yüz on beş guruşu târîh-i i‘lâmdan yirmi bir gün tamâmında edâ etmek üzere rızâmla bi’l-vekâle te’cîl eylediğimde ol dahi kabûl ve müddet-i mezkûre tamâmında edâya ba‘de’t-ta‘ahhüd müvekkil-i mezbûr Ömer Haseki husûs-ı mezkûra müte‘allik mezkûre Rukiye’den bir şey da‘vâ edip bir nesne ahzederse me’hûzuna zâminim dediği huzûr-ı âlîlerine i‘lâm olundu. Fî 24 Muharrem sene 1172.