Rumeli Sadâreti Mahkemesi 272 Numaralı Sicil (H. 1171-1172/ M. 1758) cilt: 74, sayfa: 382 Hüküm no: 479 Orijinal metin no: [97b-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Osman Efendi’ye olan borcunu ödemesi hususunda Saka Avanis’e tenbihte bulunulması Ma‘rûz, Bâ‘is-i i‘lâm el-Hâc Osman Efendi b. Abdullah, Mumcu Hasan Beşe mübâşeretiyle mahfil-i şer‘iyyâta ihzâr etdirdiği Saka Avanis v. Kirkor zimmî muvâcehesinde bin yüz yetmiş bir senesi Rûmî târîhiyle müverrah işbu temessük mantûkunca gāib ani’l-beled Saka Babik v. Varteres v. Ohan zimmetinde cihet-i karzdan hakkım olan altı yüz altmış guruşun edâsına mezbûr Avanis ile gāibân ani’l-meclis Artin v. Tatos zimmîler def‘aten kefîl ve zâmin olmalarıyla meblağ-ı mezbûrdan ber-vech-i muharrer kefâletine binâen mezbûr Avanis’in hissesine isâbet eden iki yüz yirmi guruşunu bi-hükmi’l-kefâle zimmî-yi mezbûrdan taleb ederim deyü da‘vâ ve mezbûr Avanis zimmî dahi fi’l-hakīka kaziyye minvâl-i muharrer üzere olduğunu ikrâr ü i‘tirâf etmeğin alâ-mûcibi i‘tirâfihî meblağ-ı mezbûr iki yüz yirmi guruşu müdde‘î-i mezbûr el-Hâc Osman Efendi’ye bi-hükmi’l-kefâle edâ ve teslîme mezbûr Avanis zimmîye tenbîh olunduğu huzûr-ı âlîlerine i‘lâm olundu. Fî 25 Muharremi’l-harâm sene 1172.